তেলেংগনাৰ নাগাৰকুৰনাল জিলাত থকা এটা ভূগৰ্ভস্থ জল বিদ্যুৎ প্ৰকল্পত সংঘটিত ভয়ংকৰ অগ্নিকাণ্ডত এতিয়ালৈকে নিহত হৈছে ৯ জন লোকৰ।
তেলেংগানা আৰু অন্ধ্ৰপ্ৰদেশৰ সীমান্তৰে বৈ যোৱা কৃষ্ণা নদীৰ শ্ৰীচাইলাম জলবিজ্যুৎ প্ৰকল্পত বিদ্যুতৰ শ্বৰ্ট চাৰ্কিটৰ ফলতে অগ্নিকাণ্ডৰ সূত্ৰপাত ঘটে।
জুই প্ৰকল্পটোৰ ভিতৰত বিয়পি পৰাৰ সময়তে ৮ জন কৰ্মচাৰীয়ে কোনোমতে বাহিৰলৈ ওলাই আহিবলৈ সক্ষম হয় যদিও বহু কেইজন কৰ্মচাৰী প্ৰকল্পটোৰ ভিতৰতে আৱদ্ধ হৈ পৰে।
চি আই এছ এফ আৰু অগ্নি নিৰ্বাপক বাহিনীয়ে প্ৰকল্পটোৰ জুই নুমুৱাবলৈ চেষ্টা অব্যাহত ৰাখিছে যদিও জুই এতিয়াও সম্পূৰ্ণ ভাৱে নিৰ্বাপিত হোৱা নাই।
তেলেংগনাৰ মন্ত্ৰী জগদীশ ৰেড্ডীকে ধৰি বহু শীৰ্ষ নেতাই ইতিমধ্যে ঘটনাস্থলীত গৈ উপস্থিত হৈছে।
তেলেংগানাৰ মুখ্যমন্ত্ৰী কে চন্দ্ৰশেখৰ ৰাৱে ঘটনাটোৰ চি আই ডি তদন্ত ঘোষণা কৰিছে।
ৰাজ্যখনৰ অতিৰিক্ত আৰক্ষী সঞ্চালক প্ৰধান গোবিন্দ সিঙে চি আই ডি তদন্তৰ নেতৃত্ব দিব বুলি মুখ্যমন্ত্ৰী ৰাৱে প্ৰকাশ কৰিছে।
ভূগৰ্ভস্থ জলবিদ্যুৎ প্ৰকল্পটোত বিদ্যুৎ উৎপাদনৰ কাম সম্পূৰ্ণ ৰুপে বন্ধ কৰি দিয়া হৈছে।
প্ৰকল্পটোৰ ভিতৰত কিমান লোকে কাম কৰি আছিল সেয়া এতিয়াও নিশ্চিতকৈ ক’ৱ পৰা হোৱা নাই।
