মণিপুৰী ফুটবলাৰ নিনথৈংবা মৈটেইৰ চমৎকাৰী প্ৰদৰ্শনৰ সহায়ত ভাৰতৰ অনূৰ্ধ্ব ১৮ বছৰীয়া ফুটবল দলটোৱে ইতিহাস সৃষ্টি কৰি প্ৰথমবাৰৰ বাবে ছাফ অনূৰ্ধ্ব ১৮ৰ খিতাপ দখল কৰিবলৈ সক্ষম হয়।
আজি নেপালৰ কাঠমাণ্ডুত অনুষ্ঠিত হোৱা প্ৰতিযোগিতাখনৰ ফাইনেলত ভাৰতে ২-১ৰ ব্যৱধানত বাংলাদেশক পৰাস্ত কৰে।
মেচ আৰম্ভ হোৱাৰ দুই মিনিট পাছতে বিক্ৰম প্ৰতাপ সিঙৰ সহায়ত প্ৰথমটো অগ্ৰগতিৰে ভাৰতে স্পষ্ট কৰি দিয়ে নিজৰ স্থিতি। কিন্তু এই অগ্ৰগতি বেছি সময় নাথাকিল। ৪০ মিনিটত বাংলাদেশৰ হৈ ইয়াছিন আৰাফাটে সমতাসূচক গ’লটো প্ৰদান কৰে।
প্ৰথমাৰ্ধ ১-১ত সমাপ্ত হোৱাৰ পাছত দ্বিতীয়াৰ্ধৰ আৰম্ভণিৰে পৰা ভাৰতে আক্ৰমণ তীব্ৰতৰ কৰি তোলে। ভাৰতে সঘনাই বিপক্ষৰ শিবিৰত আক্ৰমণ সংঘটিত কৰি আছিল যদিও ৯০ মিনিটলৈ গ’ল কৰাত ব্যৰ্থ হৈছিল।
কিন্তু অতিৰিক্ত সময়ত পট পৰিৱৰ্তন হ’ল মেচৰ। মেচখন অন্ত পৰিবলৈ মাত্ৰ কেইটামান ছেকেণ্ড বাকী থকা অৱস্থাত বাহাদুৰ ৰানাই ৩০ গজ দূৰৰ পৰা মাৰি পঠিওৱা এটা তীব্ৰবেগী শ্বট বিপক্ষৰ গ’লপষ্টত সোমোৱাত স্ক’ৰ লাইন ২-১ হয়।
এইদৰে মেচখন ভাৰতে ২-১ৰ ব্যৱধানত বিজয়ী হয়।
ইফালে সমগ্ৰ প্ৰতিযোগিতাখনতে দুৰ্দান্ত প্ৰদৰ্শন আগবঢ়োৱাৰ বাবে ৰাইট উইংগাৰ নিনথৈইংবা মৈটেইক ম’ষ্ট ভেল্যুৱেবল প্লেয়াৰ অব দা টুৰ্ণামেণ্ট বঁটাৰে সন্মানিত কৰে।
উল্লেখযোগ্য যে মণিপুৰৰ ইম্ফলত জন্মগ্ৰহণ কৰা এইগৰাকী প্ৰতিভাৱান যুৱ ফুটবলাৰে অলপতে আই এছ এলৰ ক্লাব নৰ্থ-ইষ্ট য়ুনাইটেডত চুক্তিবদ্ধ হৈছে।
নৰ্থ-ইষ্ট য়ুনাইটেডত চুক্তিবদ্ধ হোৱাৰ পূৰ্বে মীটেইয়ে ইণ্ডিয়ান এৰ’ছৰ হৈ খেলিছিল।
