কেৰালাত আন এজন নিপা ভাইৰাচৰ দ্বাৰা আক্ৰান্ত ৰোগীৰ মৃত্যুৰ খবৰ পোৱা গৈছে। যোৱা ১২ জুলাইত কেৰেলাৰ পলাক্কাড জিলাৰ ৫০ বছৰীয়া এজন ব্যক্তিৰ মৃত্যু হয়। যোৱা কেইদিনমানৰ পৰা স্থানীয় চিকিৎসালয়ত ভৰ্তি হৈ আছিল ব্যক্তি জন। ইয়াৰ পিছতে ৰাজ্যৰ কেইবাটাও স্থানত অতিৰিক্ত সতৰ্কবাণী জাৰি কৰিছে প্ৰশাসনে।
কেৰালাৰ স্বাস্থ্যমন্ত্ৰী বীনা জৰ্জে কয় যে আক্ৰান্ত ব্যক্তিজনৰ মঞ্জৰী মেডিকেল কলেজত পৰীক্ষা কৰা হৈছে। তাতেই তেওঁৰ ৰিপৰ্ট নিপাহ ভাইৰাছ পজিটিভ ওলায়। অৱশ্যে পুনেৰ নেশ্যনেল ইনষ্টিটিউট অৱ ভাইৰ’লজীৰ পৰা এই প্ৰতিবেদন অহাৰ পিছতহে বিষয়টো নিশ্চিত কৰিব পৰা যাব বুলিও কয় ছানীয়ে। স্বাস্থ্য বিভাগৰ সূত্ৰ অনুসৰি যোৱা কেইদিনমানৰ ভিতৰত কেৰালাত দুজন নিপাহ ভাইৰাছ ৰোগীৰ মৃত্যু হৈছে। কিছুদিন পূৰ্বে মালাপ্পুৰম জিলাত এজন নিপাহ ভাইৰাছ ৰোগীৰ মৃত্যু হৈছিল।
ইফালে, মালাপ্পুৰম আৰু পলাক্কাড জিলাত প্ৰশাসনে অতিৰিক্ত সতৰ্কবাণী জাৰি কৰিছে। জানিব পৰা মতে, পলাক্কাড জিলাত মৃত ব্যক্তিজনৰ সংস্পৰ্শলৈ অহা লোকসকলক চিনাক্ত কৰা হৈছে। প্ৰশাসনে এই পৰ্যন্ত মুঠ ৪৬ জন লোকৰ বিষয়ে জানিবলৈ সক্ষম হৈছে। এই জিলা দুখনৰ চিকিৎসালয়তো অতিৰিক্ত সাৱধানতা অৱলম্বন কৰা হৈছে। অতি প্ৰয়োজনীয় নহ’লে চিকিৎসালয়সমূহলৈ নাহিবলৈ প্ৰশাসনে সাধাৰণ ৰাইজক পৰামৰ্শ দিছে।
প্ৰসংগক্ৰমে যোৱা মাহত মালাপ্পুৰম জিলাতো এগৰাকী মহিলা আক্ৰান্ত হোৱাৰ খবৰ পোৱা গৈছিল। ভেলাঞ্চেৰী পৌৰসভাৰ বাসিন্দা ৪২ বছৰীয়া মহিলাগৰাকী আক্ৰান্ত হৈছে। জানিব পৰা মতে, প্ৰথম অৱস্থাত মহিলাগৰাকী জ্বৰত আক্ৰান্ত আছিল। তাৰ পিছত ডাক্তৰৰ পৰামৰ্শমতে তেওঁৰ কেইবাবাৰো পৰীক্ষা কৰা হয়। প্ৰাথমিক পৰীক্ষাত মহিলাগৰাকী নিপাত আক্ৰান্ত বুলি জানিব পৰা যায়। পিছত পুনেৰ নেশ্যনেল ইনষ্টিটিউট অৱ ভাইৰ’লজীত পৰীক্ষাৰ অন্তত চিকিৎসকে এই কথা নিশ্চিত কৰে। বিগত সময়ছোৱাত নিপা ভাইৰাচে বাৰে বাৰে কেৰেলাত আঘাত হানিছে। বহু লোকৰ মৃত্যুও হৈছে।
