দেশত ক্ৰমাৎ বৃদ্ধি পোৱা দুৰ্ঘটনাক লৈ চিন্তিত কেন্দ্ৰীয় পৰিবহণ মন্ত্ৰী নীতিন গাডকাৰী। সংসদত বক্তৱ্য ৰখাৰ সময়ত তেওঁ এই চিন্তা প্ৰকাশ কৰে। তেওঁৰ মতে মানুহৰ আচৰণ সলনি নহ’লে এই ভাবমূর্তি সহজে সলনি নহ’ব৷ গাডকাৰীয়ে কয়, “বিদেশলৈ গৈ আলোচনাত দুৰ্ঘটনাটোৰ কথা উঠিলে লাজতে মুখখন লুকুৱাই ৰাখিব লগা হয়।”
বৃহস্পতিবাৰে সংসদৰ শীতকালীন অধিৱেশনত ভাষণ দি তেওঁ কয় যে “পৰিবহণ মন্ত্ৰীৰ দায়িত্ব গ্ৰহণ কৰি সমগ্ৰ দেশতে দুৰ্ঘটনাৰ সংখ্যা ৫০ শতাংশ হ্ৰাস কৰাৰ লক্ষ্য লৈছিলো। ক’বলৈ লাজ নাই। হ্ৰাস পোৱাটো বহু দূৰত, ইয়াৰ বিপৰীতে সমগ্ৰ দেশতে দুৰ্ঘটনাৰ সংখ্যা বৃদ্ধি পাইছে।”
মন্ত্ৰীগৰাকীয়ে লগতে কয় যে “যেতিয়াই মই পথ দুৰ্ঘটনাৰ বিষয়ে আলোচনা হোৱা আন্তঃৰাষ্ট্ৰীয় সন্মিলনত অংশগ্ৰহণ কৰিবলৈ যাওঁ তেতিয়াই মই মুখখন লুকুৱাবলৈ চেষ্টা কৰো।”
গডকাৰীয়ে কয় যে দেশত বছৰি ১.৭৮ লাখ লোকে পথ দুৰ্ঘটনাত প্ৰাণ হেৰুৱায়। ইয়াৰে ৬০ শতাংশ লোকৰ বয়স ১৮ৰ পৰা ৩৪ বছৰৰ ভিতৰত। উত্তৰ প্ৰদেশত এবছৰত পথ দুৰ্ঘটনাত ২৩ হাজাৰ লোকৰ মৃত্যু হৈছে। ইয়াৰ পিছতে আছে তামিলনাডু। তাত মৃত্যু হৈছে ১৮ হাজাৰ লোকৰ। এই সংখ্যা মহাৰাষ্ট্ৰত ১৫ হাজাৰ আৰু মধ্যপ্ৰদেশত ১৩ হাজাৰ। দিল্লীত ১৪০০ আৰু বাংগালুৰুত ৯১৫ জন লোকৰ এবছৰত পথ দুৰ্ঘটনাত মৃত্যু হৈছে।
ইয়াৰ কাৰণ হিচাপে মন্ত্ৰীগৰাকীয়ে কয় যে পথত ট্ৰাক ৰাখি থোৱাটো পথ দুৰ্ঘটনাৰ এটা প্ৰধান কাৰণ। বহু ট্ৰাকে লেন অনুসৰণ নকৰে।
