অসমৰ চাৰি সাংবাদিকৰ বিৰুদ্ধে তদন্তৰ কোনো নিৰ্দেশ দিয়া নাই: কেন্দ্ৰীয় গৃহ মন্ত্ৰ্যালয়
অসমৰ চাৰিগৰাকী সাংবাদিকৰ বিৰুদ্ধে তদন্তৰ নিৰ্দেশ দিয়া নাই ভাৰতৰ গৃহ বিভাগে।
এই সম্পৰ্কে প্ৰচাৰিত বাতৰি অগ্ৰাহ্য কৰি শুকুৰবাৰে কেন্দ্ৰীয় গৃহ বিভাগে ইয়াক “ভিত্তিহীন” আৰু “তথ্যৰ উদ্দেশ্যপ্ৰণোদিত ব্যাখ্যা”ৰূপে অভিহিত কৰিছে।
“মন্ত্ৰ্যালয়ে কোনো তদন্তৰ নিৰ্দেশ দিয়া নাই,” গৃহ বিভাগৰ নিশ্চিতি।
অজিত কুমাৰ ভূঞা, মনজিত মহন্ত (বৰ্তমান সাংবাদিকতাৰ সৈতে জৰিত নহয়), আফ্ৰিদা হুছেইন, নিতুমণি শইকীয়া আৰু টিভি চেনেল প্ৰাগ, প্ৰতিদিন টাইম আৰু কাকত গোষ্ঠী অসমীয়া প্ৰতিদিনৰ বিৰুদ্ধে অসম চৰকাৰক গৃহ বিভাগে তদন্তৰ নিৰ্দেশ দিয়া বুলি প্ৰকাশিত বাতৰিয়ে ব্যাপক চৰ্চা লাভ কৰিছিল।
প্ৰকাশিত বাতৰিসমূহত দাবী কৰা হৈছিল যে আৰ এচ এচৰ সৈতে সম্পৰ্কিত পুনেস্থিত এক “স্বেচ্ছাসেৱী সংগঠন”ৰ অভিযোগৰ ভিত্তিত এই নিৰ্দেশ দিয়া হৈছিল।
গৃহ মন্ত্ৰ্যালয়ে জনোৱা মতে ৱিনয় জ’শী নামৰ এজন লোকৰ আবেদন অসম চৰকাৰলৈ আগবঢ়াই দিয়া হৈছে আৰু সেয়া “নিয়মমাফিক”।
“আমি এনেকুৱা বহুসংখ্যক আবেদন/ আপত্তি দৈনিক লাভ কৰো যিবোৰ নিয়ম অনুসৰি সংশ্লিষ্ট মন্ত্ৰ্যালয় বা ৰাজ্যলৈ আগবঢ়াই দিয়া হয়। জ’শীয়ে দাখিল কৰা আবেদনো সংশ্লিষ্ট ৰাজ্যলৈ নিয়ম অনুসৰি আগবঢ়াই দিয়া হৈছে,” গৃহ মন্ত্ৰ্যালয়ৰ স্পষ্টীকৰণ।
জ’শীয়ে দাখিল কৰা আবেদনত কোৱা হৈছিল যে আলফাৰ দৰে বিদ্ৰোহী সংগঠনে নাগৰিকত্ব বিধেয়ক বিষয়টোৰ “সুবিধা” লৈছে আৰু একাংশ সংবাদ মাধ্যমে বিদ্ৰোহীৰ আদৰ্শৰ প্ৰচাৰ চলাইছে।