উত্তৰ প্ৰদেশৰ সোণভদ্ৰাৰ দুখন পাহাৰত বিশাল পৰিমাণৰ সোণৰ ভাণ্ডাৰ থকা বুলি কৰা দাবী সত্য নহয় আৰু এইটো দাবী অস্বীকাৰ কৰিছে ভাৰতৰ ভূবৈজ্ঞানিক জৰীপে (Geological Survey of India)।
“নিশ্চয় কিবা ভুল বুজাবুজি হৈছে, যাৰ ফলত ভুল কথাৰ খবৰ প্ৰচাৰিত হৈছে”, ভাৰতৰ ভূবৈজ্ঞানিক জৰীপৰ এটা বিবৃতিত কোৱা হয়।
আনকি “প্ৰতিষ্ঠানটোৰ কোনোৱে এনেকুৱা তথ্য দিয়া নাছিল” বুলি মন্তব্য কৰিছে ভাৰতৰ ভূবৈজ্ঞানিক জৰীপৰ সঞ্চালক প্ৰধান এম শ্ৰীধৰে।
“ভুল বুজাবুজিৰ বাবেই সোণৰ আকৰৰ ভাণ্ডাৰৰ হিচাপ জোখতকৈ বহু বেছিকৈ দেখুওৱা হৈছে”, শ্ৰীধৰৰ মন্তব্য।
পূৰ্বে সংবাদ মাধ্যমত উত্তৰ প্ৰদেশৰ সোণভদ্ৰাৰ দুখন পাহাৰত দেশৰ ভূতত্ত্ববিদ সকলে ৩ হাজাৰ টনৰো অধিক সোণৰ ভাণ্ডাৰৰ সম্ভেদ লাভ কৰিছে বুলি এটা বাতৰি প্ৰকাশ পাইছিল।
উত্তৰ প্ৰদেশ ভূবিজ্ঞান আৰু খনন সঞ্চালকালয়ৰ (UPDGM) উদ্ধৃতিৰ সৈতে প্ৰকাশ পোৱা বাতৰিবোৰত কোৱা হৈছিল যে সম্ভেদ লাভ কৰা এই সোণৰ পৰিমাণ বৰ্তমান ভাৰত চৰকাৰৰ হাতত মজুত থকা সোণতকৈ ৫ গুণ বেছি। এই ভাণ্ডাৰে ভাৰতক সোণ উৎপাদন কৰা দেশৰ দ্বিতীয় স্থানলৈ উন্নীত কৰিব বুলিও বাতৰিবোৰত দাবী কৰা হৈছিল।
শ্ৰীধৰে কয়, সোণভদ্ৰাত ১৯৯৮-২০০০ চনৰ সময়ছোৱাত ৫২,৮০৬ টন সোণৰ আকৰ পোৱা গৈছে, যিটোৰ পৰা কেৱল ১৬০ কেজি সোণহে আহৰণ কৰিব পাৰি।
