দেশত সংহাৰী ৰূপ ধাৰণ কৰিছে কোভিডৰ দ্বিতীয়তো ঢৌৱে। প্ৰতি দিনে দেশত লাখ লাখ লোক কোভিডত আক্ৰান্ত হোৱাৰ বিপৰীতে চিকিৎসালয়ত বিচনা আৰু অক্সিজেনৰ অভাৱত হাজাৰ হাজাৰ কোভিড ৰোগীৰ মৃত্যু হৈছে।
এনে এক কোভিড পৰিস্থিতিৰ মাজতে এখন গাঁৱৰ গঞাই গছৰ তলৰ গৰু গোহালিত অস্থায়ী কোভিড চেণ্টাৰ স্থাপন কৰাৰ বাতৰি আহিছে।
দেশৰ ৰাজধানীৰ পৰা মাত্ৰ ৯০ মিনিট দূৰত্বৰ উত্তৰ প্ৰদেশৰ মেউলা গোপালগড়ৰ অঞ্চলত চিকিৎসালয় আৰু বিচনাৰ অভাৱৰ বাবেই স্থানীয় লোকে কোভিড কেয়াৰ চেণ্টাৰ নিৰ্মাণ কৰিবলৈ বাধ্য হৈছে।
মুকলি আকাশৰ তলতে স্থাপন কৰা উক্ত কোভিড চেণ্টাৰত গ্ল’কজসহ অন্যান্য ঔষধ পাতি যোগান ধৰা হৈছে।
স্থানীয় লোকে প্ৰকাশ কৰা অনুসৰি নিম গছৰ তলত তেওঁলোকে এই চেণ্টাৰ প্ৰতিষ্ঠা কৰাৰ মূলতে হ’ল নিম গছৰ তলত অক্সিজেন পৰিমাণ অধিক পোৱা যায়।
“যেতিয়া মানুহে উশাহ লওঁতে কষ্ট অনুভৱ কৰে, তেতিয়াই তেওঁলোকে নিম গছ জোপাৰ তললৈ আহি অক্সিজেনৰ পৰিমাণ বৃদ্ধি কৰি লয়।” ৭৪ বছৰীয়া সঞ্জয় সিং নামৰ লোকজনে কয়।
স্মৰ্তব্য যে সঞ্জয় সিঙৰ পিতৃৰ দুদিনৰ পূৰ্বে মৃত্যু হৈছে। তেওঁৰ পিতৃয়ে জ্বৰত ভুগিছিল আৰু উক্ত গছ জোপাৰ তলত কেবাদিনো অক্সিজেনৰ পৰিমাণ বৃদ্ধি কৰাৰ পিছতে দুদিনৰ পূৰ্বে মৃত্যু ঘটে। সিঙৰ মতে তেওঁৰ পিতৃক কোভিড টেষ্ট কৰা হোৱা নাছিল।
বৃহত্তৰ গাঁওখনত কোভিড টেষ্টৰ কোনো ব্যৱস্থাও কৰা হোৱা নাই বুলি অভিযোগ তুলিছে স্থানীয় ৰাইজে। গাঁওখনত চিকৎসাৰ কোনো সুবিধা নথকাৰ বাবেই গঞাই গছৰ তলত কোভিড চেন্টাৰ স্থাপন কৰিবলৈ বাধ্য হোৱা বুলি দাবী কৰি স্থানীয় লোকে মানুহৰ মৃত্যু ঘটিলেও তেওঁলোকক চাবলৈ কোনো মানুহে নাই বুলি মন্তব্য কৰিছে।
এই ছবিখনে যোগী আদিত্যনাথৰ শাসিত ৰাজ্য উত্তৰ প্ৰদেশত কোভিড টেষ্ট আৰু চিকিৎসাই যে সাধাৰণ লোকক স্পৰ্শ কৰা নাই সেই কথাকে প্ৰতীয়মান কৰিছে।
