কেন্দ্ৰীয় চৰকাৰে ক’ৰ’না টেষ্টিং কিটৰ ক্ষেত্ৰত দি অহা সাহায্য বন্ধ কৰি দিয়াৰ পাছত মেঘালয় চৰকাৰে বিনামূলীয়া কোভিড টেষ্টিং বন্ধ কৰাৰ সিদ্ধান্ত গ্ৰহণ কৰিছে।
মেঘালয়ৰ উপ-মুখ্য মন্ত্ৰী প্ৰেষ্টন টাইনচঙে মঙলবাৰে কয় যে, ১৬ অক্টোবৰৰ পৰা ৰাজ্যখনত ক’ৰ’নাৰ পৰীক্ষাৰ বাবে ৫০০ টকাৰ পৰা ৩২০০ টকা লোৱা হ’ব।
উপ-মুখ্য মন্ত্ৰী টাইনচঙে জনোৱা অনুসৰি ১৬ অক্টোবৰৰ পৰা মেঘালয়ত যিসকল বহিঃৰাজ্যৰ লোকে প্ৰৱেশ কৰিব তেওঁলোকে ৫০০ টকাৰ বিনিময়ত বাধ্যতামূলক ক’ৰ’নাৰ ৰেপিড টেষ্টিং কৰাব লাগিব।
আনহাতে, যিসকল লোকে আৰ টি-পি চি আৰ টেষ্ট কৰাব বিচাৰে তেওঁলোকে ৩২০০ টকা আদায় দিব লাগিব।
তেওঁ ক’ৰ’নাৰ পৰীক্ষা সম্পন্ন কৰাবলগীয়া ৯ খন হস্পিটেলৰ নামো লগতে প্ৰকাশ কৰে।
আই চি এম আৰ আৰু কেন্দ্ৰ চৰকাৰে জুলাই মাহৰ পৰা ৰাজ্যসমূহলৈ ক’ৰ’না টেষ্টিং কিটৰ ক্ষেত্ৰত আগবঢ়াই অহা সাহায্য বন্ধ কৰাৰ সিদ্ধান্ত গ্ৰহণ কৰিছিল যাৰবাবে মেঘালয় চৰকাৰে এই সিদ্ধান্ত ল’বলৈ বাধ্য হ’ল বুলিও টাইনচঙে লগতে কয়।
তেওঁ লগতে যিসকল লোকৰ শৰীৰত সকলো লক্ষণ প্ৰকাশ পোৱাৰ পাছত চিকিৎসালয়ত চিকিৎসাধীন হৈ আছে তেওঁলোকে ধন আদায় দিব নালাগে বুলিও কয়।
