ঔষধ খাই মানুহ কেনেকৈ সুস্থ হৈ উঠে, মনত উদয় হৈছিল এই প্ৰশ্নটো। উত্তৰ বিচাৰিবলৈ তেওঁ জীৱবিজ্ঞান পঢ়িবলৈ বাছি লয়। ডাক্তৰ হ’ব বিচাৰে। জীৱন নিৰ্বাহৰ বাবে চিঙৰা বিক্ৰী কৰে সঁচা। কিন্তু সময় ৰাহি কৰি পঢ়া-শুনাও কৰিলে। এতিয়া ১৮ বছৰীয়া যুৱকজনে NEET UG প্ৰৱেশ পৰীক্ষা ক্লিয়াৰ কৰি এক দৃষ্টান্ত গঢ়ি তুলিছে। তেওঁৰ নাম ছানী কুমাৰ। কৈছে, চামোছা বিক্ৰীয়ে মোৰ ভৱিষ্যত নিৰ্ধাৰণ নকৰে।
ছানীৰ জীৱন সংগ্ৰামেৰে ভৰা আছিল। নয়দাৰ ল’ৰা ১৮ বছৰীয়া ছানীয়ে দুপৰীয়া ২ বজাত স্কুল শেষ কৰি নিজৰ ষ্টলত চিঙৰা বিক্ৰী কৰিছিল। দিনটোত ৪-৫ ঘন্টা চিঙৰা বিক্ৰী কৰি ঘৰলৈ উভতি আহি গভীৰ নিশালৈকে পঢ়া-শুনা কৰিছিল।
ফিজিক্সৱালাৰ আলখ পাণ্ডেই শ্বেয়াৰ কৰিছে তেওঁৰ কাহিনী। ফিজিক্সৱালাৰ আলখ পাণ্ডেই বেছিভাগেই সকলো বিপদৰ বিপৰীতে নিজৰ সপোন পূৰণ কৰা ছাত্ৰ-ছাত্ৰীৰ প্ৰেৰণাদায়ক কাহিনী শ্বেয়াৰ কৰে। নয়দাৰ চিঙৰা বিক্ৰেতা ছানীৰ কাহিনীৰো সেইবোৰৰ সৈতে মিল আছে।
শেহতীয়াকৈ ছানীয়ে চিকিৎসা বিজ্ঞানৰ স্নাতকত নামভৰ্তিৰ বাবে নেট ইউ জি পৰীক্ষা ক্লিয়াৰ কৰিছে। ফিজিক্সৱালা ইনষ্টাগ্ৰাম পেজত আলখ পাণ্ডেই তেওঁৰ এটা ভিডিঅ’ শ্বেয়াৰ কৰে। এই ফুটেজত ছানীৰ কোঠাৰ বেৰবোৰ নোটছেৰে ভৰা। নোটছবোৰ মনত ৰাখিবলৈ ছানীয়ে এই পদ্ধতি ব্যৱহাৰ কৰিছিল। অৱশ্যে তেওঁৰ এই প্ৰচেষ্টা অসাৰ নহ’ল।
এইজন প্ৰতিভাৱান আৰু কঠোৰ পৰিশ্ৰমী যুৱকে ২০২৪ চনৰ নেট পৰীক্ষাত ৭২০ নম্বৰৰ ভিতৰত ৬৬৪ নম্বৰ লাভ কৰিছে। এবছৰ দীঘলীয়া প্ৰস্তুতিৰ অন্তত দিনে ৪-৫ ঘন্টা চামোচা বিক্ৰী কৰি তেওঁ এই স্থান অৰ্জন কৰিছে। ছানীয়ে কয় যে বহুবাৰ গোটেই ৰাতি পঢ়া-শুনাৰ বাবে ৰাতিপুৱা চকু দুটা বিষাইছিল। তথাপিও হাৰ মনা নাছিলো।
View this post on Instagram
চিকিৎসা বৃত্তিত ছানীয়ে কিয় আহিব বিচাৰিছিল? তাৰ উত্তৰ দি ছানীয়ে কয় যে মই ঔষধ দেখি মোৰ মনত আগ্ৰহ জন্মিছিল, আৰু মই জানিব বিচাৰিছিলো যে মানুহ কেনেকৈ সুস্থ হয়, সেইবাবেই মই জীৱবিজ্ঞান বাছি লৈছিলো। ছানীয়ে লগতে কয় যে চিঙৰা বিক্ৰীয়ে মোৰ ভৱিষ্যত নিৰ্ধাৰণ নকৰে।
উল্লেখ্য যে ছানীয়ে একাদশ শ্ৰেণীৰ পৰাই ফিজিক্সৱালাত অধ্যয়ন কৰি আহিছে। নিজৰ সপোন বাস্তৱায়িত কৰাৰ দৃঢ়তা, তেওঁৰ কঠোৰ পৰিশ্ৰমী মনোভাৱ দেখি আলখ পাণ্ডেই এক উল্লেখযোগ্য পদক্ষেপ লৈছে। তেওঁ ছানীক ৬ লাখ টকাৰ বৃত্তি প্ৰদানৰ প্ৰস্তাৱ দিছে। ইয়াৰ উপৰিও তেওঁ চিকিৎসা মহাবিদ্যালয়ৰ টিউচন মাচুল দিব বুলিও প্ৰতিশ্ৰুতি দিছে।
