আই এছ এলৰ আজিৰ এখন খেলত অতিৰিক্ত সময়লৈকে ০-১-অত পিছপৰি থকা নৰ্থ-ইষ্ট য়ুনাইটেডে চমকপ্ৰদ আৰু অবিশ্বাস্য প্ৰত্যাৱৰ্তনেৰে কেৰালা ব্লাষ্টাৰ্ছক ২-১-অত হৰুৱায়। এয়া নৰ্থ-ইষ্ট য়ুনাইটেডৰ ৭ম খেল আছিল। আনহাতে কেৰালাৰ আছিল ৮ম সংখ্যক খেল।
আজিৰ এই চমকপ্ৰদ জয়েৰে দলটো তালিকাৰ পঞ্চম স্থানৰ পৰা ৩ নং স্থানলৈ উঠে। এতিয়া নৰ্থ-ইষ্ট য়ুনাইটেডৰ সন্মুখত আছে কেৱল গোৱা আৰু বেংগালুৰু। দুয়োটা দলৰে পইণ্ট ১৬ হোৱাৰ বিপৰীতে নৰ্থ-ইষ্ট য়ুনাইটেডৰ পইণ্ট হ’লগৈ ১৪।
মন কৰিব লগীয়া যে গুৱাহাটীৰ ইন্দিৰা গান্ধী এথলেটিক ষ্টেডিয়ামত হোৱা আজিৰ খেলত দুয়োটা দলেই গ’ল কৰাৰ বাবে কঠিন সংগ্ৰাম কৰিব লগীয়া হৈছিল। প্ৰথম অৰ্ধ গ’লশূন্যভাৱে সমাপ্ত হোৱাৰ বিপৰীতে দ্বিতীয় অৰ্ধত খেলৰ ৭২ মিনিটত কেৰালাৰ মাটেজ পপলাটনিকে এটা গ’ল দিয়ে।
০-১ ব্যৱধানত পিছপৰি থকা অৱস্থাতেই খেলৰ মূল সময় অন্ত পৰিছিল যদিও আশা এৰা নাছিল নৰ্থ-ইষ্ট য়ুনাইটেডৰ পৰিশ্ৰমী অধিনায়ক বাৰ্থলমেউ অগবেছেই (Bartholomew Ogbeche)। অৱশেষত অতিৰিক্ত ৬ মিনিট সময়ৰ ২ মিনিট যাওঁতেই সুযোগ আহে দলটোলৈ। এটা পেনাল্টি কিকৰ সুবিধা পাই তাক অতি কলাত্মকভাৱে গ’ললৈ ৰূপান্তৰ কৰে অধিনায়ক বাৰ্থলমেউ অগবেছেই।
ইয়াৰ ৪ মিনিট পিছত, অৰ্থাৎ অন্তিম মিনিটত বিপক্ষৰ গ’লকীপাৰে টলকিব নোৱৰাকৈ এটা গ’ল দিয়ে সতীৰ্থ জুৱান ক্ৰুজে। গ’ল হোৱাৰ লগে লগে খেলৰ গতিৰ এই চমৎকাৰী পৰিৱৰ্তনত আত্মহাৰা হৈ পৰা দলটোৰ ডাচ্ছ প্ৰশিক্ষক এলকো স্কেটৰি (Eelco Schattorie) জঁপিয়াই উঠাটো আছিল চাবলগীয়া মুহূৰ্ত।
মন কৰিব লগীয়া যে কেৰালাই প্ৰথম খেলখনত জয়ী হোৱাৰ পৰা এতিয়ালৈকে জয়ৰ মুখ দেখা নাই। আজিৰ জয়ৰ সুযোগক অন্তিম মিনিটত নৰ্থ-ইষ্ট য়ুনাইটেডে পৰাজয়লৈ সলনি কৰি দলটোৰ এই দুৰ্দিন অধিক দীঘলীয়া কৰিলে।
