অক্টোবৰত ইম্ফলত প্রথমবাৰলৈ অনুষ্ঠিত হ’ব নৰ্থ-ইষ্ট অলিম্পিক গেমছ

অহা ২৪-২৮ অক্টোবৰত মণিপুৰৰ ইম্ফলত প্ৰথমবাৰলৈ অনুষ্ঠিত হ’ব নৰ্থ-ইষ্ট অলিম্পিক গেমছ। মণিপুৰ অলিম্পিক সন্থাৰ দ্বাৰা আয়োজিত এই প্ৰতিযোগিতাৰ বাবে পূৰ্ণ প্ৰস্তুতি চলি আছে। প্ৰতিযোগিতাখনত মুঠ ১২টা ইভেণ্ট থাকিব।

প্ৰতিযোগিতাখনত থাকিবলগীয়া ইভেন্টসমূহৰ ভিতৰত আছে এথলেটিকছ, আৰ্চাৰী, বক্সিং, ফুটবল, টাইকোৱানডো, টেবুল টেনিজ, ভাৰোত্তোলন, উশ্বু, বেডমিণ্টন, জুডো, কাৰাটে আৰু শ্বুটিং।

পাঁচদিনীয়াকৈ অনুষ্ঠিত হ’বলগীয়া এই প্ৰতিযোগিতাখনত উত্তৰ-পূবৰ ৰাজ্য কেইখনে অংশগ্ৰহণ কৰিব। ইম্ফলৰ খুমান লাম্পাক ষ্টেডিয়ামত হ’ব লগীয়া প্ৰতিযোগিতাখনৰ বাবে দলবোৰ অহা ২৩ অক্টোবৰত ইম্ফলত উপস্থিত হ’ব।

মণিপুৰ অলিম্পিক সন্থাৰ সম্পাদকপ্ৰধান সুনীল এলাংবামে জানিব দিয়া মতে পূৰ্বতে নৰ্থ-ইষ্ট গেমছ অনুষ্ঠিত হ’লেও প্ৰথমবাৰলৈ নৰ্থ-ইষ্ট অলিম্পিক গেমছ অনুষ্ঠিত হৈছে। ভাৰতীয় অলিম্পিক সন্থা আৰু কেন্দ্ৰীয় চৰকাৰৰ আৰ্থিক অনুদানত আয়োজন কৰা হৈছে এই নৰ্থ-ইষ্ট অলিম্পিক গেমছ।

এই নৰ্থ-ইষ্ট অলিম্পিক গেমছৰ বাবে কৰ্প’ৰেট খণ্ডয়ো সহায়ৰ হাত আগবঢ়াইছে বুলি এলাংবামে জানিব দিয়ে।