ফুটবল ভালপোৱা সকলৰ বাবে ভাল খবৰ; গুৱাহাটীত ভাৰতে খেলিব নৰ্থ-ইষ্ট য়ুনাইটেডৰ বিৰুদ্ধে
অহা ৯ অক্টোবৰত গুৱাহাটীৰ সৰুসজাই ষ্টেডিয়ামত অনুষ্ঠিত হ’ব ভাৰত আৰু নৰ্থ-ইষ্ট য়ুনাইটেডৰ মাজত এখন বন্ধুত্বপূৰ্ণ মেচ।
বাংলাদেশৰ বিৰুদ্ধে ফিফা বিশ্বকাপ আৰু এছিয়া কাপৰ যোগ্যতা নিৰ্ণায়ক মেচত অৱতীৰ্ণ হোৱাৰ আগেয়ে প্ৰস্তুতিৰ বাবে ভাৰতে আই এছ এলৰ ক্লাব নৰ্থ-ইষ্ট য়ুনাইটেডৰ বিৰুদ্ধে খেলাৰ সিদ্ধান্ত লৈছে।
গুৱাহাটীস্থ নৰ্থ-ইষ্ট য়ুনাইটেড কৰ্তৃপক্ষই জনোৱা অনুসৰি অহা ৯ অক্টোবৰৰ দিনা সন্ধিয়া ৭.৩০ বজাৰ পৰা সৰুসজাইৰ ইণ্ডিৰা গান্ধী এথলেটিক ষ্টেডিয়ামত প্ৰস্তুতিমূলক মেচখন অনুষ্ঠিত হ’ব।
প্ৰথমবাৰৰ বাবে ভাৰতৰ জাতীয় ফুটবল দলে আই এছ এলৰ কোনো ক্লাবৰ বিৰুদ্ধে প্ৰস্তুতি মেচত অংশ ল’ব।
ইতিমধ্যে বৃহস্পতিবাৰে ভাৰতীয় ফুটবল দলটোৰ প্ৰায়বোৰ খেলুৱৈ গুৱাহাটীত উপস্থিত হৈছে। সম্প্ৰতি ভাৰতৰ দলটো হোটেল ৰেডিছন ব্লুত বাহৰ পাতিছে।
মেচখনৰ বিষয়ে উল্লেখ কৰি নৰ্থ-ইষ্ট য়ুনাইটেডৰ মুখ্য প্ৰশিক্ষক ৰবাৰ্ট জাৰ্নিয়ে কয়, ‘নতুন ছিজন আৰম্ভ হোৱাৰ আগে আগে ভাৰতীয় ফুটবৰ দলৰ সৈতে খেলিবলৈ ডাঙৰ সুযোগ পাইছো। এখন বহুত ভাল মেচ হ’ব বুলি মই আশাবাদী আৰু এই মেচখনে দুয়োটা দলকে যথেষ্ট সহায় কৰিব’।
মেচখন উপভোগৰ বাবে কোনো ধৰণৰ টিকটৰ ব্যৱস্থা কৰা হোৱা নাই।
উল্লেখ্য যে মাত্ৰ এমাহৰ ভিতৰতে গুৱাহাটী তথা উত্তৰ-পূবৰ দৰ্শক সকলে দ্বিতীয়বাৰৰ বাবে সুনীল চেত্ৰী নেতৃত্বাধীন ভাৰতীয় ফুটবল দলৰ খেল উপভোগৰ সুবিধা লাভ কৰিছে।
ইয়াৰ পূৰ্বে যোৱা ৫ ছেপ্তেম্বৰত গুৱাহাটীৰ সৰুসজাইত ভাৰত-ওমানৰ মাজত অনুষ্ঠিত হৈছিল প্ৰাকবিশ্বকাপৰ মেচ। মেচখনত ২-১ৰ ব্যৱধানত পৰাস্ত হৈছিল ভাৰত। ভাৰতৰ হৈ একমাত্ৰ গ’লটো দিছিল অধিনায়ক সুনীল চেত্ৰীয়ে।
অহা ১৫ অক্টোবৰত কলকাতাৰ যুৱ ভাৰতী ক্ৰীড়াংগনত ভাৰতে নিজৰ তৃতীয়খন যোগ্যতা নিৰ্ণয়কাৰী মেচত বাংলাদেশৰ বিৰুদ্ধে অৱতীৰ্ণ হ’ব।