ৰাষ্ট্ৰীয় নাগৰিক পঞ্জী উন্নীতকৰণ প্ৰক্ৰিয়াত আপত্তি দাখিলৰ নামত একাংশ সংগঠনে ধৰ্মীয় আৰু ভাষিক সংখ্যালঘু লোকক হাৰাশাস্তি প্ৰদানৰ চেষ্টা চলাইছে, শনিবাৰে অভিযোগ আমছুৰ।
“এনে বহুত আপত্তি দাখিল হৈছে য’ত আপত্তি কৰা লোকজনে কাৰ বিৰুদ্ধে কিয় আপত্তি কৰিছে সেই বিষয়ে নাজানেই। একাংশ স্থানীয় সংগঠনৰ হেঁচাতহে তেওঁলোকে আপত্তি দাখিল কৰিছিল,” গুৱাহাটীৰ মুখ্য কাৰ্য্যালয়ত সংবাদমেলযোগে এই অভিযোগ আমছুৰ উপদেষ্টা আজিজুৰ ৰহমানৰ।
কোকৰাঝাৰ জিলাত চিত্তৰঞ্জন নাৰ্জাৰী আৰু দুৰ্জয় গয়াৰী নামৰ দুজন লোকে দাখিল কৰা আপত্তিৰ আবেদনৰ তথ্য-প্ৰমাণ দাঙি ধৰি আমছু উপদেষ্টাজনে।
লোক দুজনে যোৱা ২ মে’ত এই আপত্তিৰ আবেদন প্ৰত্যাহাৰ কৰিবলৈ কোকৰাঝাৰ জিলা উপায়ুক্তৰ ওচৰত অনুৰোধ জনোৱাত সকলো কথা পোহৰলৈ আহে বুলিও তেওঁ জানিবলৈ দিয়ে।
লোক দুজনে এবছুৰ নাৰাবাৰী আঞ্চলিক সমিতিৰ একাংশ সদস্যই জোৰ-জবৰদস্তি কৰি আবেদনত চহী কৰোৱাৰ কথা উল্লেখ কৰাৰ কথাও আজিজুৰ ৰহমানে সদৰী কৰে।
এবছুৰ উপৰিও এবছুৰ লগত সম্পৰ্ক থকা আন একাংশ সংগঠনো এই ঘটনাত জড়িত থকাৰ সন্দেহ প্ৰকাশ কৰিছে আমছুৱে।
“যিসকলে বিদেশী সমস্যা সমাধানৰ দাবীত চিঞৰি থাকে তেওঁলোকে প্ৰকৃততে এই সমস্যাটো সমাধান হোৱাটো নিবিচাৰে। এটা চক্ৰই বিদেশীৰ সমস্যাটো জীয়াই ৰাখিব বিচাৰে। সেই সকলেই এনে ধৰণৰ কাম কৰি আছে,” আজিজুৰ ৰহমানে কয়।
এটা নিশাৰ ভিতৰতে প্ৰায় ৩ লাখ আপত্তিৰ আবেদন দাখিল হোৱা বিষয়টোতে সন্দেহৰ থল আছিল বুলিও কয় আজিজুৰ ৰহমানে।
এই সকল চক্ৰান্তকাৰীক চিনাক্ত কৰি শাস্তি প্ৰদানৰ দাবী কৰিছে সংখ্যালঘু সংগঠনটোৱে।
সংবাদ মেলত তেওঁলোকে এন আৰ চিৰ শুনানিৰ স্থান যথাসম্ভৱ ওচৰত কৰাৰো দাবী কৰে।
