পশ্চিম বংগত তেল আৰু প্ৰাকৃতিক গেছৰ বিপুল খনিজ ভাণ্ডাৰৰ সন্ধান পোৱা গৈছে। অশোকনগৰৰ পিছত এইবাৰ উত্তৰ ২৪ পৰগনাৰ কংকপুল আৰু নদীয়া জিলাৰ ৰানাঘাটত দুটা নতুন তেল আৰু গেছ ব্লকৰ আৱিষ্কাৰ হৈছে। এই আৱিষ্কাৰে দেশৰ অৰ্থনীতিৰ মুখ সলনি কৰাৰ সম্ভাৱনা সৃষ্টি কৰিছে। কেন্দ্ৰীয় সংস্থা অ’এনজিচি (ONGC) ইতিমধ্যে এই খনিজ সম্পদসমূহ নিষ্কাশনৰ বাবে ক্ষেত্ৰত প্ৰৱেশ কৰিছে। শেহতীয়াকৈ সংসদত বিজেপিৰ সাংসদ শমিক ভট্টাচাৰ্যৰ প্ৰশ্নৰ উত্তৰত পেট্ৰলিয়াম আৰু প্ৰাকৃতিক গেছ মন্ত্ৰালয়ে এই তথ্য প্ৰকাশ কৰিছে।
শমিক ভট্টাচাৰ্যই ৰাজ্যসভাত দেশৰ খনিজ সম্পদৰ বিষয়ে এক প্ৰশ্ন উত্থাপন কৰিছিল। তেওঁৰ প্ৰশ্নৰ লিখিত উত্তৰত পেট্ৰলিয়াম মন্ত্ৰালয়ে জনাইছে যে কংকপুল আৰু ৰানাঘাটত বিপুল পৰিমাণৰ তেল আৰু গেছৰ মজুত আৱিষ্কাৰ হৈছে। এই দুটা ব্লকত আনুমানিক ০.৯৮ লাখ মেট্ৰিক টন খনিজ সম্পদৰ সন্ধান পোৱা গৈছে, যাৰ মূল্য প্ৰায় ৪১ হাজাৰ ৭০ কোটি টকা। এই সম্পদসমূহ ONGCৰ অধীনত ব্লক নম্বৰ WB-ONN-2005/4 ত উদ্ধাৰ কৰা হৈছে। কেন্দ্ৰীয় চৰকাৰে আশা প্ৰকাশ কৰিছে যে এই আৱিষ্কাৰে দেশৰ শক্তিৰ মজুতক সমৃদ্ধ কৰিব।
এই প্ৰসংগত উল্লেখযোগ্য যে অ’এনজিচিয়ে পূৰ্বে অশোকনগৰত এক বিশাল তৈলখাদৰ সন্ধান পাইছিল। সেই অনুসৰি তাত খননৰ কামো আৰম্ভ হৈছিল। কিন্তু ৩৮০৫ মিটাৰ খন্দাৰ পিছত যান্ত্ৰিক বিজুতিৰ বাবে কাম সাময়িকভাৱে বন্ধ কৰা হৈছে। আনহাতে, কংকপুলত ২৭৩০ মিটাৰ আৰু ৰানাঘাটত ২৭১৯ মিটাৰ খননৰ পিছত ইতিমধ্যে গেছৰ সন্ধান পোৱা গৈছে।
অ’এনজিচিৰ অনুমান অনুসৰি, দক্ষিণ ২৪ পৰগনাৰ বাৰুইপুৰতো তেল আৰু প্ৰাকৃতিক গেছৰ বিপুল ভাণ্ডাৰ থকাৰ সম্ভাৱনা আছে। এই উদ্দেশ্যে বাৰুইপুৰ পূৱ বিধানসভাৰ বেগমপুৰ পঞ্চায়তৰ ২০০ কলনী এলেকাত পৰীক্ষামূলক খননৰ কাম আৰম্ভ হৈছে। তিনি বছৰৰ চুক্তিৰে স্থানীয় কৃষকৰ পৰা মাটি লোৱা হৈছে বুলি সদৰী কৰিছে।
