২০২০ চনৰ দিল্লীৰ সাম্প্ৰদায়িক সংঘৰ্ষত উচতনি দিয়া ঘৃণামূলক ভাষণৰ অভিযোগত কেন্দ্ৰীয় মন্ত্ৰীকে ধৰি বিজেপি নেতাসকলৰ বিৰুদ্ধে দাখিল কৰা আবেদনৰ ওপৰত সিদ্ধান্ত ল’বলৈ দিল্লী উচ্চ ন্যায়ালয়ক তিনি মাহৰ সময় দিছে উচ্চতম ন্যায়ালয়ে।
যোৱা বছৰ দিল্লীৰ সাম্প্ৰদায়িক হিংসাত বিপৰ্যস্ত ভুক্তভোগীসকলৰ আবেদনত বিজেপিৰ কপিল মিশ্ৰ, পৰবেশ বাৰ্মা আৰু অভয় বাৰ্মাৰ লগতে ক্ৰীড়া মন্ত্ৰী অনুৰাগ ঠাকুৰৰ বিৰুদ্ধে এখন এজাহাৰ পঞ্জীয়ন আৰু এটা বিশেষ তদন্ত দলৰ তদন্ত বিচাৰিছিল।
উল্লেখ্য যে বিজেপি নেতা কপিল মিশ্ৰই জাফৰাবাদত নাগৰিকত্ব সংশোধনী আইন বিৰোধী প্ৰতিবাদকাৰীসকলক বলপূৰ্বক ভাৱে আঁতৰাবলৈ আহ্বান জনোৱাৰ পিছতে চলিত বৰ্ষৰ ২৩ ফেব্ৰুৱাৰীত উত্তৰ-পূব দিল্লীৰ কিছু অংশত হিংসাত্মক ঘটনা সংঘটিত হয় বুলি ২০২০ চনৰ ফেব্ৰুৱাৰীৰ উত্তৰ-পূব দিল্লী দাঙ্গাৰ তথ্য অনুসন্ধান সমিতিৰ প্ৰতিবেদনত উল্লেখ কৰা হৈছে।
উক্ত ভাষণৰ পৰৱৰ্তী তিনি দিনত “জয় শ্ৰী ৰাম”, “হৰ হৰ মোডী”, “মোডীজী, কাত দো ইন মুল্লাও কো (মোডী, এই মুছলমানসকলক টুকুৰা টুকুৰা কৰক)” আৰু “আজ হাম তুমহে আজাদী দেঙ্গে (আজি, আমি আপোনাক স্বাধীনতা দিম) আদি শ্ল’গান দিয়াৰ সময়ত মুছলমানসকলৰ বিৰুদ্ধে সমগ্ৰ জিলাজুৰি হিন্দু লোকসকলক উচতনি দিছিল।
এই হিংসাত্মক ঘটনাত ৫৩ জন লোক নিহত হোৱাৰ উপৰিও শ শ লোক আহত হয় আৰু কোটি টকাৰ সম্পত্তি ধ্বংস হয়।
