এসময়ত তেওঁ ৰিলায়েন্স ইণ্ডাষ্ট্ৰীজৰ এজন উচ্চ পৰ্যায়ৰ বিষয়া আছিল। তেওঁ মুকেশ আম্বানীৰ অতি বিশ্বস্ত হিচাপে একাধিক কাম চম্ভালিছিল। তেওঁ ৰিলায়েন্সৰ প্ৰজেক্ট ডিভিজনৰ ভাইচ প্ৰেছিডেন্ট হিচাপে জামনগৰ পেটকোক গেছ প্ৰজেক্টৰ চোৱা-চিতা কৰিছিল। তেওঁ ৭৫ কোটি টকা দৰমহা পাইছিল।
কিন্তু বহু বছৰ কৰ্পৰেট জগতত কাম কৰাৰ পিছত প্ৰকাশ শ্বাহে এটা আচৰিত আৰু সাহসী সিদ্ধান্ত লৈছিল। তেওঁ সকলো ধন-সম্পত্তি আৰু বিলাস এৰি আধ্যাত্মিক পথ অনুসৰণ কৰাৰ সিদ্ধান্ত ল’লে।
প্ৰকাশে কেমিকেল ইঞ্জিনিয়াৰিঙত স্নাতক ডিগ্ৰী সম্পূৰ্ণ কৰি আই আই টি বম্বেৰ পৰা স্নাতকোত্তৰ ডিগ্ৰী লাভ কৰিছিল। তেওঁৰ শক্তিশালী কাৰিকৰী দক্ষতা আৰু নেতৃত্বৰ ক্ষমতাই তেওঁক ৰিলায়েন্স ইণ্ডাষ্ট্ৰীজত দ্ৰুত উন্নতিত সহায় কৰিছিল।
কেইবাবছৰ ধৰি মুকেশ আম্বানিৰ সৈতে ঘনিষ্ঠভাৱে কাম কৰি কোম্পানীটোৰ সফলতাত মুখ্য ভূমিকা পালন কৰিছিল প্ৰকাশে। তেওঁৰ পত্নী নয়না শ্বাহো শিক্ষিত আৰু বাণিজ্য শাখাত ডিগ্ৰীধাৰী।
প্ৰকাশৰ দুজন পুত্ৰ আছে। ইয়াৰে এজনে ইতিমধ্যে দীক্ষা লৈছে। দ্বিতীয় পুত্ৰ বিবাহিত আৰু তেওঁৰ এটি সন্তান আছে। প্ৰকাশে বহুদিনৰ পৰা নিজে দীক্ষা লোৱাৰ পৰিকল্পনা কৰিছিল। কিন্তু ক’ভিড-১৯ মহামাৰীয়ে তেওঁৰ আধ্যাত্মিক যাত্ৰাত বিলম্ব ঘটায়।
অৱশেষত মহাবীৰ জয়ন্তীৰ দিনা প্ৰকাশ আৰু তেওঁৰ পত্নী নয়নাই একেলগে দীক্ষা লয়। জৈন ধৰ্ম আৰু অন্যান্য আধ্যাত্মিক পৰম্পৰাত দীক্ষা মানে সকলো লৌকিক মোহ ত্যাগ কৰি আভ্যন্তৰীণ শান্তি আৰু স্বাধীনতাৰ পথ (মোক্ষ) অনুসৰণ কৰা।
আজি প্ৰকাশৰ জীৱন সম্পূৰ্ণ সলনি হৈছে। খালী ভৰিৰে খোজ কাঢ়ে, শুভ্ৰ কাপোৰ পিন্ধে আৰু খাদ্যৰ বাবে ভিক্ষা কৰি জীৱন-যাপন কৰে। তেওঁ সকলো বিলাসীতা ত্যাগ কৰি সম্পূৰ্ণৰূপে আধ্যাত্মিক বিকাশ আৰু সৰলতাৰ ওপৰত মনযোগ দিছে।
