জামুগুৰিহাটৰ টৌভঙাত সোমবাৰে নিশা সংঘটিত হোৱা এক শোকাৱহ পথ দুৰ্ঘটনাত এজন সেনা জোৱানে প্ৰাণ হেৰুৱাবলগীয়া হোৱাৰ লগতে আন চাৰিগৰাকী লোক গুৰুতৰভাৱে আহত হয়।
ঘটনাৰ বিৱৰণী অনুসৰি, সোমবাৰে নিশা জামুগুৰিহাটৰ ১৫ নং ৰাষ্ট্ৰীয় ঘাইপথেৰে খোজকাঢ়ি আহি থকা অৱস্থাত সঞ্জু বৰা নামৰ ভাৰতীয় সেনাবাহিনীত কৰ্মৰত জোৱানগৰাকীক এখন দ্ৰুতবেগী বলেৰ’ পিক আপ বাহনে নিয়ন্ত্ৰণ হেৰুৱাই খুন্দা মাৰে। তীব্ৰবেগী বলেৰ’খনৰ খুন্দাত সঞ্জু বৰা গুৰুতৰভাৱে আহত হৈ থিতাতে বাগৰি পৰে।
ঘটনাস্থলীত উপস্থিত ৰাইজে সেনা জোৱানগৰাকীক ততাতয়াকৈ চিকিৎসালয়লৈ লৈ যায় যদিও চিকিৎসকে তেওঁক মৃত বুলি ঘোষণা কৰে।দুৰ্ঘটনাৰ ফলত অকালতে মৃত্যুক সাৱতিবলগীয়া হোৱা সঞ্জু বৰুৱাৰ ঘৰ জামুগুৰিহাটৰ গেৰেলুৱাচুকত।
আনহাতে, নিয়ন্ত্ৰণ হেৰুৱা বলেৰ’ বাহনখনে সেনাবাহিনীৰ জোৱানজনক খুন্দা মৰাৰ উপৰিও পথত থকা আন আন পথচাৰীকো খুন্দা মাৰে। গাড়ীখনৰ খুন্দাত চাৰিগৰাকী অন্য পথচাৰী গুৰুতৰভাৱে আহত হয়।
আহতসকলক তেজপুৰ চিকিৎসা মহাবিদ্যালয় চিকিৎসালয়ত ভৰ্তি কৰোৱা হয়।
উল্লেখযোগ্য যে, দুৰ্ঘটনাৰফলত মৃত্যু হোৱা সেনা জোৱানগৰাকীয়ে ছুটীত ঘৰলৈ আহিছিল। এনেদৰে সেনাজোৱান গৰাকীয়ে মৃত্যুক সাৱতিবলগীয়া হোৱাত অঞ্চলটোত শোকৰ ছাঁ পৰে।
চলিত মাহৰ প্ৰথমভাগত তেজপুৰৰ ৰঙাপাৰাত সেনাবাহিনীৰ গাড়ী দুৰ্ঘটনাগ্ৰস্ত হৈ দুজন সেনাবাহিনীৰ জোৱানে কৰুণ মৃত্যুক সাৱতিবলগীয়া হৈছিল।
