বিশ্বৰ স্বাস্থ্য চিকিৎসা সেৱা ইমান উন্নত হৈ উঠাৰ পাছতো এতিয়ালৈকে কৰ’না ভাইৰাছৰ দৰে মহামাৰীৰ চিকিৎসা সম্ভৱ হোৱা নাই।
আনহাতে, এতিয়াও বহু লোকে জৰাফুকা বা বেজালিৰ চিকিৎসা কৰি অন্ধবিশ্বাসেৰে মানুহৰ জীৱনৰ সৈতে খেলা কৰি আহিছে।
মধ্য প্ৰদেশৰ ৰতলামত এনে এগৰাকী ভণ্ড বাবাৰ কৰ’না সংক্ৰমণৰ ফলত মৃত্যু হৈছে। এই ‘বাবা’গৰাকীয়ে লোকৰ হাতত চুমা খাই চিকিৎসা কৰাৰ দাবী কৰিছিল।
তদুপৰি, পানীত ফুক মাৰি মন্ত্ৰ মাতি লোকৰ চিকিৎসা কৰি সুস্থ কৰাৰো দাবী কৰিছিল।
জৰাফুকা কৰা এই বাবাৰ মৃত্যুৰ পাছত প্ৰশাসন সষ্টম হৈ পৰে আৰু বাবাই চিকিৎসা কৰা লোকসকলৰ তালিকা প্ৰস্তুত কৰে।
‘বাবা’ৰ সংস্পৰ্শলৈ অহা লোকৰ দীঘলীয়া তালিকা দেখি প্ৰশাসনো বিপাঙত পৰিছে।
ৰতলামৰ চিকিৎসা বিষয়া ডাঃ প্ৰভাকৰ নানাৱৰে জানিবলৈ দিয়া মতে মৃত বাবাৰ সংস্পৰ্শলৈ অহা ৭জন লোকৰ কৰ’না পজিটিভ পোৱা গৈছে যাৰ ভিতৰত এগৰাকী গৰ্ভৱতী মহিলাও আছে।
আনহাতে, এনে পৰিস্থিতিত প্ৰশাসনে চহৰখনত অন্ধবিশ্বাসৰ নামত জৰাফুকা কৰা ‘বাবা’সকলৰ তথ্য সংগ্ৰহ কৰিছে।
চহৰখনত এনেদৰে জৰাফুকা কৰা বা তাবিজ আদি অন্ধবিশ্বাসেৰে লোকৰ চিকিৎসা কৰা প্ৰায় ৩৭জন লোক প্ৰশাসনে বিচাৰি পাইছে।
প্ৰশাসনে জৰাফুকা কৰা বা তাবিজ আদি দিয়া এই ৩৭জন বাবাকে কোৱাৰেন্টাইন কৰিছে।
কোৱাৰেন্টাইনত ৰখাৰ পাছতে ‘বাবা’সকলে আপত্তি প্ৰদৰ্শন কৰি কয় যে তেওঁলোকে বছৰ বছৰ ধৰি এনেদৰে চিকিৎসা কৰি আহিছে যদিও লকডাউনৰ সময়ত তেওঁলোকৰ ওচৰলৈ কোনা অহা নাই অথচ বিনা কাৰণে তেওঁলোকক এইদৰে ৰখা হৈছে।
