উচ্চতম ন্যায়ালয়ে গুজৰাটৰ জামনগৰত ৰিলায়েন্স ফাউণ্ডেচনৰ দ্বাৰা পৰিচালিত গ্ৰীণছ জুলজিকেল ৰেচকিউ এণ্ড ৰিহেবিলিটেচন চেণ্টাৰ বনতৰাৰ কাৰ্য্যকলাপৰ ওপৰত উত্থাপিত গুৰুতৰ অভিযোগৰ তদন্তৰ বাবে বিশেষ অনুসন্ধান দল (SIT) গঠন কৰিবলৈ নির্দেশ দিছে।
বন্যপ্ৰাণী বিশেষকৈ হাতী দেশ-বিদেশৰ পৰা অবৈধভাৱে সংগ্ৰহ কৰা, বন্যপ্ৰাণী সুৰক্ষা আইন লংঘন কৰা, ধন সৰবৰাহৰ অনিয়ম আদি গুৰুতৰ অভিযোগ উত্থাপন কৰা দুটাকৈ জনস্বাৰ্থ জড়িত গোচৰৰ শুনানি গ্ৰহণ কৰি ন্যায়াধীশ পংকজ মিঠাল আৰু প্ৰসন্ন বি ভাৰলেৰ বিচাৰপীঠে এই নিৰ্দেশনা প্ৰদন কৰিছে।
এই এছআইটিৰ নেতৃত্বত থাকিব উচ্চতম ন্যায়ালয়ৰ প্ৰাক্তন ন্যায়াধীশ জে চেলামেশ্বৰ। লগতে উত্তৰাখণ্ড আৰু তেলেংগানা উচ্চ ন্যায়ালয়ৰ প্ৰাক্তন মুখ্য ন্যায়াধীশ ৰঘৱেন্দ্ৰ চৌহান, মুম্বাইৰ প্ৰাক্তন আৰক্ষী আয়ুক্ত হেমন্ত নাগ্ৰালে (আই পি এছ) আৰু শুল্ক বিভাগৰ অতিৰিক্ত আয়ুক্ত অনিশ গুপ্তা (আই আৰ এছ)কো সদস্য হিচাপে অন্তৰ্ভুক্ত কৰা হৈছে।
আদালতে মন্তব্য কৰে যে অভিযোগবোৰত প্ৰমাণৰ অভাৱ থাকিলেও, “যেতিয়া বিধিগত সংস্থা বা আদালতে নিজে কাৰ্য্য কৰিবলৈ অনিচ্ছুক বা অক্ষম বুলি অভিযোগ উঠে, তেতিয়া স্বাধীনভাৱে এক বাস্তৱিক পৰ্যবেক্ষণৰ প্ৰয়োজন।”
এই দলটোৱে বন্যপ্ৰাণী সুৰক্ষা আইন, ১৯৭২ আৰু চিআইটিইএছৰ (CITES) নিয়ম মান্যতাৰ পৰীক্ষা, পশু কল্যাণৰ মানদণ্ড, পৰিৱেশৰ ওপৰত প্ৰভাৱ, ধন সৰবৰাহৰ অনিয়ম আদি সকলো দিশৰ পৰ্যালোচনা কৰিব। পৰিবেশ, বন আৰু জলবায়ু পৰিৱৰ্তন মন্ত্ৰালয়, গুজৰাট চৰকাৰৰ বন আৰু আৰক্ষী বিভাগৰ সহযোগত ২০২৫ চনৰ ১২ ছেপ্টেম্বৰৰ ভিতৰত বিস্তৃত প্ৰতিবেদন জমা দিব লাগিব।
উল্লেখযোগ্য যে চলিত বছৰৰ আৰম্ভণিতে প্ৰধানমন্ত্ৰী নৰেন্দ্ৰ মোদীয়ে বনতৰাৰ উদ্বোধন কৰি একে বিদেশী আৰু বিপন্ন প্ৰজাতিৰ প্ৰধান উদ্ধাৰ আৰু পুনৰ্বাসন কেন্দ্ৰ বুলি বৰ্ণনা কৰিছিল। যদিও তদন্তমূলক প্ৰতিবেদন আৰু এন জি অ’ৰ অভিযোগত বনতৰাক বিশ্বজুৰি অবৈধ বন্যপ্ৰাণী বাণিজ্যক ইন্ধন যোগোৱাৰ আশংকা প্ৰকাশ কৰা হৈছে। পানী আৰু কাৰ্বন ক্ৰেডিটৰ দৰে সম্পদৰ অপব্যৱহাৰৰ অভিযোগো উঠিছে আম্বনী মালিকাধীন কেন্দ্ৰটো।
আদালতে স্পষ্ট কৰিছে যে এই তদন্তক কেৱল অনুসন্ধানমূলক হিচাপে গ্ৰহণ কৰা হৈছে, অভিযোগসমূহৰ কোনো পূৰ্ববিচাৰ কৰা হোৱা নাই। এই গোচৰৰ পৰৱৰ্তী শুনানিৰ তাৰিখ ১৫ ছেপ্টেম্বৰত ধাৰ্য কৰা হৈছে।
