দেশৰ আটাইতকৈ সুৰক্ষিত স্থানসমূহৰ ভিতৰত অন্যতম ৰাষ্ট্ৰপতি ভৱনতো বিয়পিছে কৰ’না ভাইৰাছৰ আতংক।
ৰাষ্ট্ৰপতি ভৱনত কৰ্মৰত এগৰাকী ছাফাইকৰ্মীৰ বোৱাৰীয়েকৰ কোভিড-১৯ পজিটিভ ধৰা পৰিছে। তেওঁ পৰিয়ালৰ সৈতে ৰাষ্ট্ৰপতি ভৱনৰ কেম্পাছতে বাস কৰে।
এই ঘটনা মঙলবাৰে পোহৰলৈ অহাৰ পাছত কেম্পাছত থকা ১২৫টা পৰিয়ালক হোম কোৱাৰেন্টাইন কৰা হৈছে।
জানিব পৰা মতে, কিছুদিন আগতে ছাফাইকৰ্মীগৰাকীৰ বোৱাৰীয়েকৰ মাকৰ কৰ’না ভাইৰাছৰ ফলত মৃত্যু হৈছিল। গাঁৱত অন্তিম সৎকাৰত ছাফাইকৰ্মীটোৰ গোটেই পৰিয়াল উপস্থিত আছিল।
ইয়াৰ পাছতে গোটেই পৰিয়ালটোকে আইছ’লেশ্যনলৈ প্ৰেৰণ কৰা হয় আৰু তেওঁলোকৰ কৰ’না ভাইৰাছৰ পৰীক্ষা কৰা হয়।
পৰীক্ষাত বাকী সকলোৰে নিগেটিভ আহে যদিও বোৱাৰীয়েকৰ পজিটিভ ধৰা পৰে।
ইতিমধ্যে, ইয়াৰ পাছতে স্বাস্থ্য বিভাগে কেম্পাছত থকা ১২৫টা পৰিয়ালক কোৱাৰেন্টাইন কৰে।ইয়াৰ ভিতৰত ২৫টা পৰিয়াল উক্ত পৰিয়ালটো থকা ব্লকটোৰে। তেওঁলোকক সম্পূৰ্ণ বাহিৰলৈ ওলোৱাটো নিষেধ কৰা হৈছে আৰু ৰাষ্ট্ৰপতি ভৱনৰ পৰাই তেওঁকৰ খাদ্য যোগান ধৰা হৈছে।
বাকী পৰিয়ালসমূহক গেলামাল দোকানলৈ যোৱাৰ অনুমতি দিয়া হৈছে যদিও আইছ’লেশ্যনত থকাৰ নিৰ্দেশ দিয়া হৈছে।
