মাজুলীৰ অফলামুখ ঘাটত অচিনাক্ত যুৱতীৰ মৃতদেহ উদ্ধাৰ; দিচাঙত ডুব যোৱা যুৱতীৰ দেহ বুলি সন্দেহ
আজি মাজুলীৰ অফলামুখ ঘাটৰ সমীপত এগৰাকী অচিনাক্ত যুৱতীৰ মৃতদেহ উদ্ধাৰ হয়। ইতিমধ্যে ঘটনাস্থলীত আৰক্ষীৰ লোক উপস্থিত হৈ তদন্ত অব্যাহত ৰাখিছে যদিও বৰ্তমানলৈকে উদ্ধাৰ হোৱা যুৱতী গৰাকীৰ মৃতদেহ চিনাক্ত কৰিব পৰা হোৱা নাই।
ইফালে স্থানীয় ৰাইজে ১৬ ডিচেম্বৰত দিচাং নৈত পৰি শোকাৱহভাৱে মৃত্যুক আঁকোৱালি লোৱা যুৱতী দুগৰাকীৰ মাজৰে এগৰাকী যুৱতীৰ মৃতদেহ হ’ব পাৰে বুলি সন্দেহ প্ৰকাশ কৰিছে।
উল্লেখযোগ্য যে শিৱসাগৰৰ দিচাংমুখ অফলা গাঁৱত ব্ৰহ্মপুত্ৰ নদীৰ পাৰত ১৬ ডিচেম্বৰত অঞ্জলি ছেত্ৰী আৰু আৰতী ছেত্ৰী নামৰ যুৱতী দুগৰাকীয়ে পূজাৰ সামগ্ৰী বিসৰ্জন দি মোবাইলত ফটো তুলিবলৈ লওঁতেই নদীৰ গৰাৰ পৰা পিছল খাই পৰি মৃত্যুক আঁকোৱালি লৈছিল।
মন কৰিব লগীয়া যে যুৱতী দুগৰাকী বিচাৰি ১৭ জনীয়া এছ ডি আৰ এফৰ এটা দলে তিনিটা ভাগত ভাগ হৈ উদ্ধাৰ অভিযান চলাইছিল। কিন্তু আজিলৈকে যুৱতী দুগৰাকীৰ মৃতদেহ উদ্ধাৰ কৰিবলৈ সক্ষম নহ’ল।
ফলত আজি মাজুলীৰ অফলামুখ ঘাটত উদ্ধাৰ হোৱা যুৱতী গৰাকীৰ মৃতদেহ উক্ত যুৱতী দুগৰাকীৰে এজনী হ’ব পাৰে বুলি স্থানীয় ৰাইজে সন্দহে প্ৰকাশ কৰিছে।