আজি পুৱা ৰাজ্যত পুনৰ এগৰাকী লোকৰ দেহত মাৰাত্মক ক’ৰ’না ভাইৰাছৰ উপস্থিতি পোৱা গৈছে।
বৰপেটা মেডিকেল কলেজৰ পৰীক্ষাগাৰত কৰা পৰীক্ষাৰ পিছতে লোকজন ক’ভিড-১৯ত আক্ৰান্ত বুলি স্বাস্থ্য বিভাগে নিশ্চিত কৰে।
ক’ভিড-১৯ত আক্ৰান্ত লোকজন কোকৰাঝাৰৰ কোৱাৰেণ্টাইন চেণ্টাৰৰ বুলি জানিব পৰা যায়।
স্বাস্থ্য মন্ত্ৰী ড০ হিমন্ত বিশ্ব শৰ্মাই বৃহস্পতিবাৰে পুৱা প্ৰায় ৯.২০ বজাত টুইটাৰযোগে এই কথা জনাইছে।
এই পৰ্যন্ত নতুনকৈ আক্ৰান্ত লোকজনৰ বিষয়ে কোনো ধৰণৰ তথ্য জানিব পৰা নাই।
উল্লেখ্য যে বুধবাৰৰ দিনটোত ৰাজ্যখনত মুঠ ৩১ গৰাকীকৈ লোক মাৰাত্মক ক’ৰ’না ভাইৰাছত আক্ৰান্ত হয়।
বৰ্তমান ১৩৪ গৰাকী লোক ক’ৰ’না ভাইৰাছত আক্ৰান্ত হৈ চিকিৎসাধীন হৈ থকাৰ বিপৰীতে ৪৮ জন ৰোগী সম্পূৰ্ণৰূপে সুস্থ হৈ চিকিৎসালয় এৰিছে।
আনহাতে এই পৰ্যন্ত ক’ৰ’নাৰ ফলত চাৰিগৰাকী লোক মৃত্যু মুখত পৰিছে।
১৯ মে’ অৰ্থাৎ মঙলবাৰে ৰাজ্যখনত সৰ্বাধিক ৪২ গৰাকীকৈ লোকৰ দেহত এই মাৰাত্মক ভাইৰাছৰ উপস্থিতি পোৱা গৈছিল।
