মঙলবাৰে নিশা ভয়াবহ পথ দুৰ্ঘটনাত পতিত হয় পাৰ্বত্য উন্নয়ন দপ্তৰৰ মন্ত্ৰী ছুম’ ৰংহাঙৰ কনভয়ৰ এখন গাড়ী।
দুৰ্ঘটনাটোত ৰংহাঙৰ ব্যক্তিগত দেহৰক্ষী ৰামছিং তেৰাঙৰ থিতাতে মৃত্যু হয়।
দুৰ্ঘটনা সংঘটিত হোৱা সময়ত ৰংহাঙৰ ব্যক্তিগত দেহৰক্ষী গৰাকী কনভয়ৰ অন্য এখন গাড়ীত আহি আছিল।
জানিব পৰা মতে, মঙলবাৰে নিশা কাছমাৰীত ৰাস মহোৎসৱৰ উদ্বোধনী অনুষ্ঠানত অংশগ্ৰহণ কৰি উভতি আহি থকা অৱস্থাত ৰংহাঙৰ কনভয়ৰ এ এছ-০৯এফ-৬১৭৭ নম্বৰৰ ইন’ভা গাড়ীখনে নিয়ন্ত্ৰণ হেৰুৱাই নদীৰ দ খাৱৈ এটাত পৰি যায়।
কাৰ্বি আংলঙৰ বকলিয়াৰ ৰজাপথাৰ নামৰ ঠাইত নিশা দুৰ্ঘটনাটো সংঘটিত হয়।
দুৰ্ঘটনা সংঘটিত হোৱাৰ পাছত কনভয়ৰ বাকী কেইখন গাড়ীত থকা লোকসকল আৰু স্থানীয় লোকৰ সহায়ত উদ্ধাৰ অভিযান চলোৱা হয় যদিও ৰামছিঙৰ থিতাতে মৃত্যু ঘটে।
আনহাতে, দুৰ্ঘটনাত আকস্মিকভাৱে প্ৰাণ হেৰুৱা ৰামছিং তেৰাঙলৈ মন্ত্ৰীগৰাকীয়ে গভীৰ শ্ৰদ্ধাঞ্জলি জ্ঞাপন কৰি তেওঁৰ পৰিয়াললৈ সকলো প্ৰকাৰৰ সহায় সহযোগিতাৰ আশ্বাস দিয়ে।
