ডিমা হাচাও জিলাৰ জিলা সদৰ হাফলঙত নিয়ন্ত্ৰণ হেৰুৱাই অসম পৰিবহন নিগমৰ এএছ ২০ ১৯৫৪ নম্বৰৰ এখন বাছ এটা ঘৰৰ ভিতৰত সোমাই যোৱা ঘটনাই তীব্ৰ চাঞ্চল্যৰ সৃষ্টি কৰিছে।
দুৰ্ঘনাটো সোমবাৰে বিয়লি প্ৰায় তিনিটা মানত সংঘটিত হয়। উক্ত দুৰ্ঘটনাত এগৰাকী যুৱক আহত হয়। মূৰত আঘাত পোৱা যুৱকজনক হাফলং অসামৰিক চিকিত্সালয়ত ভৰ্তি কৰোৱা হৈছে।
ঘটনা সংঘটিত হোৱাৰ লগে লগে ক্ৰেইন আনি বাছখন ঘৰৰ ভিতৰৰ পৰা ওলোৱা হয়।
হাফলং অসামৰিক চিকিত্সালয়ত যোৱা পথ আৰু অসম পৰিবহন নিগমৰ হাফলং বাছ আস্থানৰ মাজত দুৰ্ঘটনাটো সংঘটিত হয়।
প্ৰত্যক্ষদৰ্শী আৰু অসম পৰিবহন নিগম হাফলং বাছ আস্থানৰ জনৈক কৰ্মীয়ে দিয়া ভাষ্য অনুসৰি বাছখন ওচৰৰ বাছ আস্থানৰ পৰা ওলাই অহাৰ সময়তেই বাছৰ ব্ৰেক ফেল হয়। বহুত চেষ্টা কৰিও বাছ ৰখাব নোৱাৰিলে।
কিন্তু আন এটা সূত্ৰৰ অভিযোগ অনুসৰি বিন্টু বৰা নাম অসম পৰিবহন নিগমৰ বাছ চালক গৰাকী সদায় সুৰাসক্ত হৈ থাকে আৰু আজিও আছিল। যাৰ বাবে নিয়ন্ত্ৰণ হেৰুৱাই এই দুৰ্ঘটনা সংঘটিত হয়।
দুৰ্ঘটনাত ক্ষতিগ্ৰস্থ হোৱা ঘৰৰ গৰাকী হেমঞ্জয় জিদুঙে ক্ষতিপূৰণ দাবী কৰাৰ লগতে আহত যুৱকজন ভাড়াতীয়া হিচাপে আছিল বুলি জানিবলৈ দিয়ে।
