সৰভোগৰ বেঁকী নৈত দলঙৰ পৰা জাঁপ দি আত্মহত্যা অচিনাকি যুৱতীৰ
দেওবাৰে বৰপেটা জিলাৰ সৰভোগত বেঁকী নৈৰ দলঙৰ পৰা এগৰাকী অচিনাকি যুৱতীয়ে জঁপিয়াই আত্মহত্যা কৰাৰ ঘটনা সংঘটিত হয়। প্ৰত্যক্ষদর্শীৰ পৰা জানিব পৰা মতে যুৱতীগৰাকী জীনছ পৰিহিতা আছিল আৰু যুৱতীগৰাকী ক’ৰ পৰা আহি তাত উপস্থিত হৈছিল সেয়া নিশ্চিত কৰিব পৰা নাই।
আনহাতে, বৰ্তমানলৈকে যুৱতীগৰাকীৰ পৰিচয় জানিব পৰা হোৱা নাই। যুৱতীগৰাকীয়ে নদীত জাঁপ দিয়া মাছমৰীয়াই দেখা পায় আৰু লগে লগে কেইবাজনো মাছমৰীয়াই উদ্ধাৰ অভিযান চলায় যদিও কোনো সন্ধান উলিয়াব নোৱাৰিলে।
তেওঁলোকে লগে লগেই সৰভোগ আৰক্ষীক খবৰ দিয়ে। পাছত আৰক্ষীয়ে ঘটনাস্থলীত উপস্থিত হৈ দলঙৰ পৰা পৰিত্যক্ত ছেন্দেল আৰু কাপোৰ উদ্ধাৰ কৰে।
ইপিনে আৰক্ষীয়ে তৎপৰতা প্ৰদৰ্শন কৰি এছ ডি আৰ এফ বাহিনীক খবৰ দিয়ে আৰু এছ ডি আৰ এফ বাহিনীয়ে ঘটনাস্থলীত উপস্থিত হৈ বেঁকী নৈত উদ্ধাৰ অভিযান চলায় যদিও এই পৰ্যন্ত যুৱতীগৰাকীৰ কোনো সন্ধান উলিয়াব পৰা নাই।
যুৱতী গৰাকীয়ে বেঁকী নৈত জঁপিয়াই আত্মহত্যা কৰা ঘটনাই অঞ্চলব্যাপী চাঞ্চল্যৰ সৃষ্টি কৰিছে। যুৱতীগৰাকীয়ে কি কাৰণত আত্মহত্যাৰ পথ বাছি লৈছে সেয়া এতিয়াও ৰহস্যৰ আৱৰ্তত।