প্ৰায় পাঁচমাহ জোৰা পদযাত্ৰাৰ অন্তত আজি সামৰণি পৰিব কংগ্ৰেছৰ বহুচৰ্চিত ‘ভাৰত জোড়ো যাত্ৰা’। কংগ্ৰেছ সাংসদ ৰাহুল গান্ধীৰ নেতৃত্বত যোৱা ৮ ছেপ্টেম্বৰত তামিলনাডুৰ কন্যাকুমাৰীৰ পৰা আৰম্ভ হোৱা এই পদযাত্ৰা আজি কাশ্মীৰৰ শ্ৰীনগৰত সমাপ্ত হ’ব। যাত্ৰাৰ সামৰণিৰ উপলক্ষে কংগ্ৰেছে শ্বেৰ-ই-কাশ্মীৰ ক্ৰিকেট ষ্টেডিয়ামত আয়োজন কৰিছে এক মেগা ৰেলী।
এই সমাৱেশত কংগ্ৰেছৰ দলীয় নেতৃত্বৰ উপৰিও বিৰোধী দলৰ বহুকেইগৰাকী নেতাই অংশগ্ৰহণ কৰাৰ সম্ভাৱনা আছে। অৱশ্যে শ্ৰীনগৰত হোৱা প্ৰচণ্ড তুষাৰপাতৰ ফলত ‘ভাৰত জোড়ো যাত্ৰা’ৰ সামৰণি অনুষ্ঠানৰ উদযাপনত কিছু অসুবিধা হ’ব পাৰে। তুষাৰপাতৰ ফলত শ্ৰীনগৰ-জম্মু ৰাষ্ট্ৰীয় ঘাইপথ বন্ধ হৈ পৰিছে আৰু বিমান পৰিবহণতো ব্যাঘাত জন্মাব পাৰে।
শ্ৰীনগৰৰ বিমানবন্দৰৰ সঞ্চালক কুলদীপ সিং ঋষিয়ে এক টুইট যোগে তুষাৰপাতৰ বাবে শ্ৰীনগৰলৈ সকলো বিমান যাত্ৰা পলম হোৱা বুলি জানিবলৈ দিছে। ইতিমধ্যে দিল্লীৰ পৰা শ্ৰীনগৰলৈ যাত্ৰা কৰা দুয়োখন বিমান বাতিল কৰিছে ভিষ্টাৰ এয়াৰলাইন্সে।
উল্লেখ্য যে চলিত মাহৰ আৰম্ভণিতে কংগ্ৰেছে দেশৰ ২১ টা বিৰোধী দলক এই সমাৱেশত যোগদান কৰিবলৈ আমন্ত্ৰণ জনাইছিল৷ ইয়াৰ ভিতৰত দ্ৰাবিদা মুনেত্ৰ কাঝাগম (ডি এম কে), ফাৰুক আব্দুল্লা নেতৃত্বাধীন জম্মু-কাশ্মীৰ ৰাষ্ট্ৰীয় সন্মিলন, মেহবুবা মুফতীৰ জম্মু-কাশ্মীৰ পিপলছ ডেম’ক্ৰেটিক পাৰ্টি (পিডিপি), বিদুথালাই চিৰুথাইগাল কট্চি (ভিচিকে), আই ইউ এম এল, কেৰালা কংগ্ৰেছ, চি পি আই, আৰ এছ পি, শিবু ছ’ৰেনৰ ঝাৰখণ্ড মুক্তি মৰ্চা (জেএমএম)য়ে শ্ৰীনগৰত অনুষ্ঠিত হ’বলগীয়া এই সমাৱেশত অংশগ্ৰহণ কৰিব বুলি জানিব পৰা গৈছে।
আনহাতে শাৰদ পাৱাৰৰ জাতীয়তাবাদী কংগ্ৰেছ পাৰ্টি (এনচিপি), তেজস্বী যাদৱ নেতৃত্বাধীন ৰাষ্ট্ৰীয় জনতা দল (আৰজেডি), নীতিশ কুমাৰৰ জনতা দল (ইউনাইটেড), চিপিআই(এম), অখিলেশ যাদৱ নেতৃত্বাধীন সমাজবাদী পাৰ্টি, মমতা বেনাৰ্জী নেতৃত্বাধীন তৃণমূল কংগ্ৰেছে আজিৰ এই ৰেলীত অংশগ্ৰহণ নকৰে বুলি সূত্ৰই প্ৰকাশ কৰিছে।
স্মৰ্তব্য যে কন্যাকুমাৰীত আৰম্ভ হোৱা কংগ্ৰেছৰ এই যাত্ৰাই ১২ খন ৰাজ্য আৰু দুখন কেন্দ্ৰীয় শাসিত অঞ্চল অতিক্ৰম কৰিছে। পূৰ্বনিৰ্ধাৰিত সূচী অনুসৰিয়েই কংগ্ৰেছে শ্ৰীনগৰত যাত্ৰাৰ সমাপ্তি ঘটাব। যাত্ৰাৰ মাজতে কালি ৰাহুল গান্ধীয়ে লাল চ’কত ত্ৰিৰংগা উত্তোলন কৰি আন এক ইতিহাস ৰচনা কৰিছিল।
কালিৰ এই কাৰ্যসূচীৰ পাছতে ৰাহুল গান্ধীয়ে এক টুইট যোগে ‘ঘৃণাক হৰুওৱাই প্ৰেম সদায় জয়ী হ’ব বুলি মন্তব্য কৰি ভাৰতত আশাৰ নতুন জোৱাৰ আহিব বুলি আশা প্ৰকাশ কৰিছিল। শাসকীয় বিজেপিয়ে দেশত ঘৃণাৰ ৰাজনীতি কৰা বুলি অভিযোগ কৰি বিজেপিৰ এই ৰাজনীতিৰ বিৰুদ্ধে কংগ্ৰেছে আৰম্ভ কৰিছিল এই যাত্ৰা। কালি লাল চ’কত ত্ৰিৰংগা উত্তোলন কৰি যাত্ৰাৰ এই উদ্দেশ্যক সফল কৰি তোলা বুলি চৰ্চিত হৈছে।
