লকডাউন বলৱৎ হৈ নাথাকিলেও দেশৰ পৰা ক’ৰ’ণা কিন্তু আঁতৰি যোৱা নাই। আজি সন্ধিয়া ৬ বজাত প্ৰধানমন্ত্ৰী নৰেন্দ্ৰ মোদীয়ে দেশবাসীক সম্বোধি দিয়া ভাষণত এইদৰে কয়।
দেশবাসীক উদ্দেশ্যি দিয়া ভাষণত কোনো নতুন ঘোষণা নকৰিলেও প্ৰধানমন্ত্ৰী মোদীয়ে ক’ৰ’ণা প্ৰতিৰোধৰ স্বাৰ্থত কোভিড প্ৰটক’ল মানি চলিবলৈ দেশবাসীক আহ্বান জনায়।
প্ৰধানমন্ত্ৰীয়ে লগতে আৰু কয় যে “যোৱা ৭-৮ মাহজুৰি দেশবাসীয়ে কৰা প্ৰচেষ্টাৰ ফলত দেশৰ পৰিস্থিতি সুস্থিৰ হৈ আছে আৰু এই সুস্থিৰতাক আমি যাতে পুনৰ অৱনতি হ’বলৈ নিদিওঁ।”
পৰিস্থিতি উন্নতৰ হোৱাৰ লগে লগে অনেকেই সাৱধানতা অৱলম্বন কৰা বন্ধ কৰি দিছে, যিটো উচিত হোৱা নাই বুলি ভাষণত প্ৰধানমন্ত্ৰী মোদীয়ে উল্লেখ কৰে।
মাস্ক পৰিধান নকৰাকৈ ঘৰৰ পৰা উলাই যোৱা লোকে কেৱল নিজৰেই নহয়, নিজৰ লগতে পৰিয়াল তথা শিশু, বয়োজ্যেষ্ঠসকলকো বিপদত পেলাব পাৰে বুলি ব্যক্ত কৰি সকলোকে মাস্ক পৰিধান কৰি ঘৰৰ পৰা উলাবলৈ আহ্বান জনায় প্ৰধানমন্ত্ৰী মোদীয়ে।
দেশৰ বিজ্ঞানীসকলে ক’ৰ’ণাৰ ভেকচিন আৱিষ্কাৰৰ বাবে আহোপুৰুষাৰ্থ কৰি আহিছে বুলিও কয় প্ৰধানমন্ত্ৰী মোদীয়ে।
আনহাতে ক’ৰ’ণাত বিধ্বস্ত শীৰ্ষ দেশ ক্ৰমে আমেৰিকা, ব্ৰাজিল, স্পেইন, ব্ৰিটেইন আদিৰে তুলনা কৰি কয় যে ভাৰতৰ ক’ৰ’ণাক্ৰান্তৰ মৃত্যুৰ হাৰ যথেষ্ট কম।
“ভাৰতত প্ৰতি ১০ লাখ জনসংখ্যাৰ বিপৰীতে ক’ৰ’ণাক্ৰান্তৰ মৃত্যুৰ সংখ্যা মাত্ৰ ৮৩ জন আৰু আমেৰিকা, ব্ৰাজিল, স্পেইন, ব্ৰিটেইন আদি দেশত ইয়াৰ সংখ্যা ৬০০ৰো অধিক।” প্ৰধানমন্ত্ৰী মোদীয়ে কয়।
তেওঁ লগতে কয় যে প্ৰতি ১০ লাখ মানুহৰ ভিতৰত ভাৰতত ৫,৫০০ জন লোক ক’ৰ’ণাত আক্ৰান্ত হৈছে আৰু আমেৰিকা আৰু ব্ৰাজিলত ইয়াৰ সংখ্যা হৈছে প্ৰায় ২৫ হাজাৰ জন।
ৰামচৰিত মানসৰ উপমাৰে প্ৰধানমন্ত্ৰীয়ে কয়, “আমি সম্পূৰ্ণৰূপে মুক্তি নোপোৱালৈকে জুই, শত্ৰু আৰু ৰোগক সহজভাৱে ল’ব নালাগে।”
উল্লেখ্য যে মংগলবাৰে দেশত প্ৰথমবাৰৰ বাবে তিনি মাহত ৫০ হাজাৰৰো কম লোক ক’ৰ’ণাত আক্ৰান্ত হোৱাৰ তথ্য আহিছে। ৭.৬ মিলিয়নৰ ভিতৰত ভাৰতত ৪৬,৭৯০ জন কোভিড পজিটিভ পোৱা গৈছে।
যোৱা ২৪ ঘণ্টাত দেশত ৫৭৮ গৰাকী কোভিড আক্ৰান্তৰ মৃত্যু হৈছে। ইয়াকে লৈ ভাৰতত কোভিড১৯ত আক্ৰান্ত হৈ মৃত্যু হোৱা লোকৰ সংখ্যা ১,১৫,১৯৭ গৰাকীলৈ বৃদ্ধি পালে।
