ক’ৰ’না ভাইৰাছ প্ৰতিৰোধৰ বাবে ৰাজ্য চৰকাৰৰ অসম আৰোগ্য নিধি ফাণ্ডলৈ এই পৰ্যন্ত ৰাজ্যখনৰ ৮,০৫৪ গৰাকী লোকে ১৭.৩৭ কোটি টকা আগবঢ়োৱা বুলি মন্ত্ৰী হিমন্ত বিশ্ব শৰ্মাই জানিবলৈ দিয়ে।
এই সংকটৰ সময়ত ৰাজ্য চৰকাৰক সহায় কৰা প্ৰত্যেক গৰাকী লোককে মন্ত্ৰী হিমন্তই ধন্যবাদ জ্ঞাপন কৰে।
‘মই জনাবলৈ পাই সুখী হৈছো যে ক’ৰ’না ভাইৰাছৰ বিৰুদ্ধে যুঁজিবলৈ এই পৰ্যন্ত ৮০৫৪ গৰাকী লোকে অসম আৰোগ্য নিধি ফাণ্ডলৈ বৰঙণি আগবঢ়াইছে। সৰ্বমুঠ ১৭.৩৭ কোটি টকা সংগ্ৰহ হৈছে। আপোনাৰ সহায়ে বহু দূৰলৈ লৈ যাব’, মন্ত্ৰী শৰ্মাই দেওবাৰে টুইটযোগে এইদৰে কয়।
উল্লেখ্য যে এই পৰ্যন্ত অসমত ২৬ গৰাকী লোক ক’ৰ’নাত আক্ৰান্ত হৈছে।
ইফালে দেশত দ্ৰুত হাৰত বৃদ্ধি পাই আছে ক’ৰ’না ভাইৰাছত আক্ৰান্তৰ সংখ্যা। স্বাস্থ্য মন্ত্ৰ্যালয়ে জনোৱা অনুসৰি এই পৰ্যন্ত দেশত তিনি হাজাৰৰো অধিক লোক ক’ৰ’নাত আক্ৰান্ত হৈছে আৰু ইয়াৰ ফলত ১০০ৰো অধিক লোকৰ মৃত্যু হৈছে।
