অক্সফ’ৰ্ড এডভান্স্ড লাৰ্ণাৰছ ডিক্স’নাৰীৰ শেহতীয় সংস্কৰণত এইবাৰ কেইবাটাও নতুন ভাৰতীয় শব্দ সন্নিৱিষ্ট হৈছে।
নতুনকৈ সন্নিৱিষ্ট হোৱা ২৬টা ভাৰতীয় ইংৰাজী শব্দৰ ভিতৰত আধাৰ, চাউল,ডাব্বা, হৰতাল আৰু শ্বাদীও অন্তৰ্ভুক্ত হৈছে।
শুকুৰবাৰে মুকলি কৰা ডিক্স’নাৰীখনৰ দশম সংস্কৰণটোত মুঠতে ৩৮৪টা ভাৰতীয় ইংৰাজী শব্দ সন্নিৱিষ্ট হৈছে।
আনহাতে, ডিক্স’নাৰীখনত ১,০০০তকৈ অধিক নতুন শব্দ অন্তৰ্ভুক্ত কৰা হৈছে। এইবাৰ ফেক নিউজ আৰু মাইক্ৰ’প্লাষ্টিকৰ দৰে শব্দ নতুনকৈ সন্নিৱিষ্ট হৈছে।
সংস্কৰণটোত সন্নিৱিষ্ট ২৬টা নতুন ভাৰতীয় ইংৰাজী শব্দৰ ভিতৰত ২২টা ইয়াৰ ছপা ডিক্স’নাৰীখনত আৰু বাকী চাৰিটা ইয়াৰ ডিজিটেল সংস্কৰণত স্থান পাইছে।
নতুনকৈ সন্নিৱিষ্ট হোৱা ভাৰতীয় ইংৰাজী শব্দ চাৰিটা হৈছে কাৰেন্ট (ইলেক্ট্ৰচিটিৰ বাবে), লুটাৰ (looter),লুটিং( looting)আৰু উপজিলা।
অক্সফ’ৰ্ড এডভান্স্ড লাৰ্ণাৰছ ডিক্স’নাৰীয়ে বিগত প্ৰায় আঠটা দশক ধৰি ইংৰাজী ভাষাৰ শিকাৰুসকলৰ বাবে অত্যন্ত উপযোগী সাৰথি হিচাপে কাম কৰি আহিছে।
৭৭ বছৰীয়া অক্সফ’ৰ্ড এডভান্স্ড লাৰ্ণাৰছ ডিক্স’নাৰীখন ১৯৪২ চনত প্ৰথম জাপানত ছপা হৈছিল আৰু পাছত ১৯৪৮ চনত অক্সফ’ৰ্ড য়ুনিভাৰ্ছিটি প্ৰেছে লৈ আনে।