কাশ্মীৰ সমস্যাৰ সমাধান আলোচনাৰে সম্ভৱ, যুদ্ধৰে নহয়ঃ পাক প্ৰধানমন্ত্ৰী

ভাৰতৰ প্ৰতি যেন নৰম মনোভাব গ্ৰহণ কৰিছে পাক প্ৰধানমন্ত্ৰী শ্বেহবাজ শ্বৰীফে৷ শেহতীয়াকৈ তেওঁ আলোচনাৰ জৰিয়তে কাশ্মীৰ সমস্যাৰ সমাধান বিচাৰিছে আৰু যুদ্ধ কোনো বিকল্প নহয় বুলিও মন্তব্য কৰিছে। হাৰ্ভাৰ্ড বিশ্ববিদ্যালয়ৰ ছাত্ৰ-ছাত্ৰীৰ এটা প্ৰতিনিধি দলৰ সৈতে বাৰ্তালাপ কৰি শ্বৰীফে লগতে কয় যে ৰাষ্ট্ৰসংঘৰ প্ৰস্তাৱ অনুসৰি কাশ্মীৰ সমস্যাৰ সমাধানৰ বাবে অঞ্চলটোত শান্তি স্থাপনৰ চেষ্টা চলাব লাগিব৷

তেওঁ কয়” পাকিস্তানে অঞ্চলটোত শান্তি বজাই ৰখাৰ সংকল্প লৈছে, আৰু ৰাষ্ট্ৰসংঘৰ প্ৰস্তাৱ অনুসৰি আলোচনাৰ মাজৰে কাশ্মীৰ সমস্যাৰ সমাধান কৰিব বিচাৰিছে,” ৷

তেওঁ কয় যে পাকিস্তানে স্থায়ী শান্তি বিচাৰে আৰু আলোচনাৰ জৰিয়তে ভাৰতৰ সৈতে শান্তি স্থাপন কৰাটো সম্ভৱ৷ যুদ্ধ ইয়াৰ বিকল্প নহয় বুলিও তেওঁ কয়৷ উল্লেখ্য কাশ্মীৰ সমস্যা আৰু পাকিস্তানৰ পৰা উদ্ভৱ হোৱা সীমান্তৰ সিপাৰৰ সন্ত্ৰাসবাদক লৈ ভাৰত আৰু পাকিস্তানৰ মাজৰ সম্পৰ্ক তিক্ত হৈ আহিছে৷ ভাৰতে সংবিধানৰ ৩৭০ অনুচ্ছেদ বাতিল কৰাৰ লগতে আৰু জম্মু-কাশ্মীৰৰ বিশেষ মৰ্যাদা প্ৰত্যাহাৰ কৰাৰ পিছত আৰু ৰাজ্যখনক দুটা কেন্দ্ৰীয় শাসিত অঞ্চলত বিভক্ত কৰিছে৷

ভাৰতে পাকিস্তানক বাৰে বাৰে কৈছে যে জম্মু আৰু কাশ্মীৰ “দেশৰ এক অবিচ্ছেদ্য অংগ আছিল, আছে আৰু হৈ থাকিব”। ভাৰতে কৈছে যে তেওঁলোকে সন্ত্ৰাস, শত্ৰুতা আৰু হিংসামুক্ত পৰিৱেশত পাকিস্তানৰ সৈতে স্বাভাৱিক চুবুৰীয়া ৰাষ্ট্ৰৰ দৰে সম্পৰ্ক বিচাৰে। বাৰ্তালাপৰ সময়ত শ্বৰীফে আঙুলিয়াই দিয়ে যে ইছলামাবাদ আৰু নতুন দিল্লীৰ বাণিজ্যৰ ক্ষেত্ৰত সহযোগিতা থাকিব লাগে ।

তেওঁ কয় যে পাকিস্তান আক্ৰমণকাৰী নহয়, দেশ খনৰ পাৰমাণৱিক শক্তি আৰু প্ৰশিক্ষিত সেনা হৈছে প্ৰতিৰোধৰ বাবেহে৷ তেওঁ লগতে কয় যে ইছলামাবাদে ইয়াৰ সীমা সুৰক্ষাৰ বাবেধন ব্যয় কৰে, আক্ৰমণৰ বাবে নহয়।