আই চি চি বিশ্বকাপ-২০১৯ ৰ দেওবাৰে ইংলেণ্ড আৰু ভাৰতৰ মাজত অনুষ্ঠিত হ’বলগীয়া প্ৰতিযোগিতাখনৰ ৩৮ সংখ্যক খেলখনত পাকিস্তান আৰু বাংলাদেশৰ অনুৰাগীসকলে টীম ইণ্ডিয়াৰ বিজয়ৰ বাবে প্ৰাৰ্থনা কৰিব। কিয়নো ভাৰত জিকিলেই পাকিস্তান আৰু বাংলাদেশৰ বিশ্বকাপৰ পৰৱৰ্তী যাত্ৰা উজু হ’ব।
দেওবাৰে এজবেষ্টনত ইংলেণ্ড হাৰিলে তেওঁলোকৰ বিশ্বকাপৰ যাত্ৰা ইয়াতেই ইতি পৰিব। এনেকুৱা পৰিস্থিতিত পাকিস্তান আৰু বাংলাদেশৰ ছেমিফাইনেলত প্ৰৱেশৰ সম্ভাৱনা মজবুত হৈ পৰিব।
এই বিশ্বকাপৰ গণিত অনুসৰি পাকিস্তানৰ আশা এতিয়াও সজীৱ হৈ আছে। পাকিস্তানে এতিয়ালৈকে ৮খন মেচ খেলি ৪খনত জয়লাভ কৰাৰ বিপৰীতে ৩ খনত হাৰিছে আৰু এখন বাতিল হৈছে। এইদৰে দলটোৱে ৯ অংকৰে পইন্ট তালিকাৰ চতুৰ্থ স্থানত আছে।
পাকিস্তানৰ পৰৱৰ্তী খেলখন আছে বাংলাদেশৰ বিৰুদ্ধে আৰু সেই মেচখনত পাকিস্তানে যিকোনো উপায়ে বিজয়ী হোৱাৰ লগতে আজি ইংলেণ্ডৰ পৰাজয় আৰু ভাৰতৰ বিজয়ৰ বাবে প্ৰাৰ্থনা কৰিব লাগিব।
আনহাতে, প্ৰতিযোগিতাখনত বাংলাদেশে ৭ খন মেচ খেলিছে আৰু ইয়াৰে তিনিখনত বিজয়ী আৰু আন তিনিখনত পৰাজিত হোৱাৰ বিপৰীতে এখন মেচ বৰষুণৰ বাবে বাতিল হৈছে। পইন্ট তালিকাত ৭ অংকৰে দলটো ছয় নম্বৰ স্থানত আছে।
পৰৱৰ্তী ৰাউণ্ডত প্ৰৱেশৰ বাবে বাংলাদেশে পৰৱৰ্তী দুয়োখন মেচতে জিকিব লাগিব। তদুপৰি, আজি ইংলেণ্ড পৰাজিত হোৱাৰ বাবে তেওঁলোকেও প্ৰাৰ্থনা কৰিব লাগিব। তেতিয়া হ’লে বাংলাদেশে ১১ পইন্ট লাভ কৰিব।
সেয়াই নহয়, আজিৰ খেলখনত ভাৰত বিজয়ী হোৱাৰ কামনা কৰিছে নিউজিলেণ্ডেও। অন্তিম চাৰিটা স্থানত স্থান লাভ কৰিবলৈ টীম ইণ্ডিয়া আৰু নিউজিলেণ্ডক আৰু এখনকৈ মেচত জয়লাভ কৰিব লাগে।
ভাৰতৰ আৰু তিনিখন মেচ বাকী আছে আৰু এই তিনিখন মেচ ইংলেণ্ড, বাংলাদেশ আৰু শ্ৰীলংকাৰ বিৰুদ্ধে আছে। আনহাতে, অষ্ট্ৰেলিয়াৰ হাতত পৰাজিত হোৱাৰ পাছত নিউজিলেণ্ডে এতিয়া ইংলেণ্ডক অতিক্ৰম কৰিহে নিজৰ স্থান বনাব লাগিব। সেয়েহে, দেওবাৰৰ খেলখনত নিউজিলেণ্ডেৰ সমৰ্থকসকলেও টীম ইণ্ডিয়াৰ বিজয়ৰ বাবেই প্ৰাৰ্থনা কৰিব।
উল্লেখযোগ্য যে টীম ইণ্ডিয়াই যদি ইংলেণ্ডক পৰাজিত কৰে আৰু পাকিস্তানে পৰৱৰ্তী দুয়োখন মেচতে জয়লাভ কৰে, তেনেহ’লে দুয়োখন চুবুৰীয়া দেশে ছেমিফাইনেলত প্ৰৱেশ কৰিব পাৰে। এনেকুৱা পৰিস্থিতিত শ্ৰীলংকাই কমেও দুখন মেচত হাৰিব লাগিব। আনহাতে, ইংলেণ্ডে যদি বাকী দুয়েখন মেচতে পৰাজিত হয় তেতিয়াহ’লে তেওঁলোকে ৮ পইন্টতে সন্তুষ্ট থাকিব লাগিব।
আনহাতে, পাকিস্তান আৰু বাংলাদেশে যদি এখনকৈ মেচত জয়লাভ কৰে তেনেহ’লে তেওঁলোকে ৯ পইন্টকৈ লাভ কৰিব। এনে পৰিস্থিতিত ভাল ৰাণ ৰেটৰ আধাৰত বাংলাদেশ আগত থাকিব। যদি ইংলেণ্ড, পাকিস্তান আৰু বাংলাদেশ তিনিটা দলেই এখনকৈ মেচত বিজয়ী হৈ যায় তেতিয়াহ’লে ইংলেণ্ড চাৰি নম্বৰ স্থানত উপনীত হ’ব কিয়নো তেতিয়া তেওঁলোকৰ ১০ পইন্ট হৈ যাব। এইক্ষেত্ৰতো কিন্তু শ্ৰীলংকাই কমেও দুখন মেচত হাৰিব লাগিব।
মুঠতে, এনেকুৱা বহু সমীকৰণৰ মাজত আজি (দেওবাৰে) হ’বলগীয়া ভাৰত আৰু ইংলেণ্ডৰ মাজৰ যুঁজখনত বিশেষকৈ পাকিস্তান আৰু বাংলাদেশৰ তীক্ষ্ণ নজৰ থাকিব। কিয়নো আজিৰ ফলাফলে তেওঁলোকৰ ভৱিষ্যৎ নিৰ্দ্ধাৰণ কৰিব।
