ৱিকিপিডিয়াক নিষিদ্ধ কৰিছে পাকিস্তানে। আগতেই সতৰ্ক কৰি দিয়া হৈছিল যে ধৰ্মদ্ৰোহৰ বিষয়টো ৪৮ ঘণ্টাৰ ভিতৰত উঠাই ল’ব লাগিব। সেই সময়সীমা উকলি যোৱাৰ বাবে পাকিস্তানে ৱিকিপিডিয়া ব্লক (বন্ধ) কৰিছে।
বাতৰি অনুসৰি, পাকিস্তান টেলিকম কৰ্তৃপক্ষই (পিটিএ) সতৰ্ক কৰি দিছিল যে ৱিকিপিডিয়াই যদি ধৰ্মদ্ৰোহৰ ওপৰত থকা প্ৰবন্ধ সোনকালে আঁতৰ নকৰে তেন্তে দেশখনত নিষিদ্ধ কৰা হ’ব।
এক টুইটযোগে পিটিএ-য়ে কয়, “ৱিকিপিডিয়াক বিদ্বেষৰ বিষয়ে প্ৰবন্ধ আঁতৰাবলৈ নিৰ্দেশ দিয়া হৈছিল। কিন্তু তেওঁলোকে নিৰ্ধাৰিত সময়ৰ ভিতৰত বিষয়টো আঁতৰাবলৈ ব্যৰ্থ হৈছিল। কেৱল সেয়াই নহয়, ই ইচ্ছাকৃতভাৱে পিটিএ-ৰ নিৰ্দেশনা অমান্য কৰিছে। ৪৮ ঘণ্টা দিয়াৰ পিছতো ধৰ্মদ্ৰোহৰ বিষয়ে প্ৰবন্ধ প্ৰত্যাহাৰ নকৰাৰ বাবে ৱিকিপিডিয়াক নিষিদ্ধ কৰা হৈছে।”
পিটিএ-য়ে লগতে কয় যে ৱিকিপিডিয়াই কেতিয়া এই বিতৰ্কিত বিষয়টো আঁতৰায়, তাৰপিছতহে তেওঁলোকৰ পৰা নিষেধাজ্ঞা উঠাই লোৱা উচিত নে নহয় সেয়া সিদ্ধান্ত লোৱা হ’ব।
শেহতীয়াকৈ, পাকিস্তানে সামাজিক মাধ্যম আৰু ৱেবছাইটত কঠোৰ নিৰীক্ষণ আৰম্ভ কৰিছে। কেৱল নিৰীক্ষণেই নহয়, পাকিস্তান চৰকাৰে বহুতো ৱেবছাইট আৰু ছ’চিয়েল মিডিয়াৰ বিৰুদ্ধে ব্যৱস্থাও গ্ৰহণ কৰিছে।
দেশখনে শেহতীয়াকৈ ৭০০ তকৈও অধিক ‘ইছলাম বিৰোধী’ ইউটিউব লিংক ব্লক কৰিছে যিবোৰে সমগ্ৰ দেশখনতে প্ৰতিবাদৰ ধুমুহাৰ সৃষ্টি কৰিছিল।
