অনাৰ কিলিঙৰ এক জঘন্য ঘটনাই চাঞ্চল্যৰ সৃষ্টি কৰিছে পাকিস্তানত। দেশখনৰ কোহিস্তান অঞ্চলত নিজৰ পৰিয়ালেই হত্যা কৰিছে এগৰাকী কিশোৰীক। কিশোৰীগৰাকীৰ অপৰাধ, দুজনমান যুৱকৰ সৈতে কিশোৰীগৰাকীয়ে নৃত্য কৰিছিল।
এই নৃত্যৰ ভিডিঅ’ ছ’চিয়েল মিডিয়াত ভাইৰেল হোৱাৰে পৰিণতিতে সন্মান হানি হোৱাৰ ক্ষোভত পৰিয়ালৰ নৃশংসতাৰ চিকাৰ হয় কিশোৰীগৰাকী। আনহাতে আৰক্ষীৰ হস্তক্ষেপৰ বাবে কোনোমতে প্ৰাণ ৰক্ষা পৰে নৃত্য কৰা আন এগৰাকী কিশোৰীৰ।
প্ৰকাশিত খবৰ অনুসৰি, অঞ্চলটোৰ বয়োজ্যেষ্ঠসকলৰ দ্বাৰা পৰম্পৰাগতভাৱে গঠিত জিৰ্গা নামৰ স্থানীয় পৰিষদৰ নিৰ্দেশত কিশোৰীগৰাকীৰ পৰিয়ালে এই হত্যাকাণ্ড সংঘটিত কৰে।
ভাইৰেল হোৱা একেটা ভিডিঅ’ত দেখা পোৱা আন এগৰাকী কিশোৰীকো জিৰ্গাই মৃত্যুদণ্ডৰ শাস্তি প্ৰদান কৰিছিল যদিও শাস্তি কাৰ্যকৰী হোৱাৰ পূৰ্বেই আৰক্ষীয়ে সেই কিশোৰীগৰাকীক উদ্ধাৰ কৰে।
ইফালে কিশোৰীগৰাকীৰ হত্যাকাণ্ডক লৈ পাকিস্তানত তীব্ৰ প্ৰতিক্ৰিয়াৰ সৃষ্টি হৈছে আৰু সচেতন লোকসকলে সন্মান হানিৰ নামত এইদৰে কৰা হত্যাকাণ্ড অৰ্থাৎ অনাৰ কিলিং বন্ধ কৰাৰ আহ্বান জনাইছে।
জিলাখনৰ এগৰাকী শীৰ্ষ পৰ্যায়ৰ আৰক্ষী বিষয়াই ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে বুলি উল্লেখ কৰে। লগতে কিশোৰীগৰাকীৰ পৰিয়ালৰ সদস্যক গ্ৰেপ্তাৰ কৰা হৈছে বুলিও সংবাদ মাধ্যমৰ আগত সদৰী কৰে বিষয়াগৰাকীয়ে।
ভিডিঅ’টোত থকা আনগৰাকী কিশোৰীয়ে পৰিয়ালৰ পৰা নিজৰ জীৱনৰ প্ৰতি কোনো ভাবুকি অনুভৱ কৰা নাই আৰু পৰিয়ালৰ লগত যোৱাৰ ইচ্ছা প্ৰকাশ কৰিছে বুলি আৰক্ষীয়ে জানিবলৈ দিয়ে।
কিশোৰীকেইগৰাকীক হত্যা কৰা আৰু জিৰ্গা আহ্বানৰ পৰামৰ্শ দিয়া তথা মৃত্যুদণ্ডৰ শাস্তি দিয়া লোকসকলৰ সন্ধানত তদন্ত আৰম্ভ কৰা বুলিও আৰক্ষীয়ে জানিবলৈ দিয়ে।
আনহাতে এই জঘন্য হিংসাত্মক পৰিস্থিতিৰ ফলত ভীতিগ্ৰস্ত হৈ ভিডিঅ’টোত কিশোৰীগৰাকীৰ সৈতে নৃত্য কৰা দেখিবলৈ পোৱা যুৱককেইজনে আত্মগোপন কৰিছে।
