অহা ২৪ ফেব্ৰুৱাৰিত আমেৰিকাৰ ৰাষ্ট্ৰপতি ডোনাল্ড ট্ৰাম্পে ভাৰত ভ্ৰমণ কৰিবলগীয়া দিনটোৰ পূৰ্বে বিমানবন্দৰৰ চৌপাশৰ সকলো পথ তথা দেৱাল মসৃন কৰি ৰখাৰ ব্যৱস্থা লোৱা হৈছে।
ইয়াৰ বাবে আহমেদাবাদ পৌৰ নিগমৰ স্বাস্থ্য বিভাগে বিমানবন্দৰৰ অঞ্চলটোত থকা তিনিখন পান দোকান বন্ধ কৰি দিছে।
আহমেদাবাদ পৌৰ নিগমৰ এগৰাকী বিষয়াই জানিবলৈ দিয়া মতে পৰৱৰ্তী নিৰ্দেশ নিদিয়া পৰ্যন্ত দোকান কেইখন বন্ধ থাকিব।
ট্ৰাম্পে ভ্ৰমণ কৰিবলগীয়া ৰাজ্যখনৰ বাট পথসমূহক আকৰ্ষণীয় কৰি তোলাৰ বাবে সকলো ফালৰ পৰা প্ৰস্তুতি চলোৱা হৈছে।
আনকি, ৰাস্তাৰ কুকুৰবোৰকো সংশ্লিষ্ট কৰ্তৃপক্ষই গঁড়ালত আৱদ্ধ কৰি থৈছে।
শিৱসেনাৰ মুখপত্ৰ ‘সামনা’ৰ মতে গুজৰাটৰ কৰ্তৃপক্ষই ট্ৰাম্পক আদৰিবলৈ মহানগৰখনক সাজু কৰি তোলাৰ বাবে ১০০ কোটি টকা খৰচ কৰিছে।
ট্ৰাম্পে উদ্বোধন কৰিবলগীয়া আহমেদাবাদৰ মটেৰা ষ্টেডিয়ামত কাৰ পাৰ্কিঙৰ বাবে ৩০০০খন গাড়ী তথা ১০,০০০খন দুচকীয়া বাহন ৰাখিব পৰা জেগা ৰাখিছে।
ডোনাল্ড ট্ৰাম্পে আহমেদাবাদৰ বিখ্যাত সৱৰমতী আশ্ৰম পৰিদৰ্শন কৰিব আৰু এটা ৰোডশ্ব’ত অংশ ল’ব।
ইয়াৰ পাছতে নেতা দুগৰাকীয়ে এখন নতুন ক্ৰিকেট ষ্টেডিয়াম উদ্বোধন কৰি সমৱেত লোকসকলক উদ্দেশ্যি ভাষণ দিব।
