বৃহস্পতিবাৰৰ পৰা আৰম্ভ হোৱা পঞ্চায়ত নিৰ্বাচনৰ ভোট গণনাৰ ফলাফলত কংগ্ৰেছৰ অন্যতম দুৰ্গ দলটোৰ উপ-দলপতি তথা প্ৰাক্তন প্ৰভাৱশালী মন্ত্ৰী ৰকিবুল হুছেইনৰ গৃহ সমষ্টি চামগুৰিত কংগ্ৰেছে বেয়াকৈ মুখ থেকেছা খাইছে।
কালি ঘোষণা হোৱা ফলাফল অনুসৰি হুছেইনৰ নিজা গাঁও পঞ্চায়ত তথা চামগুৰি সমষ্টিৰ অধীনৰ ১৩২নং আমলখি গাঁও পঞ্চায়তত সভাপতি আৰু আঞ্চলিক সদস্য পদৰ লগতে আটাইকেইটা ৱাৰ্ড মেম্বাৰ পদতে বিজেপিৰ প্ৰাৰ্থী জয়ী হয়।
১৩২নং আমলখি গাঁও পঞ্চায়তত বিজেপিৰ সভানেত্ৰী পদৰ প্ৰাৰ্থী সোণালী বেহেৰাই ৩৬০০টা ভোট লাভ কৰাৰ বিপৰীতে আঞ্চলিক সদস্য পদত ৰাজু চবৰে ৩৫৭৯টা ভোট লাভ কৰি বিজয় সাব্যস্ত কৰে।
উল্লেখযোগ্য যে উক্ত পঞ্চায়তখনৰ সমূহ ৱাৰ্ডতে বিজেপিয়ে সৰ্বমুঠ ৩৬১০ ভোট লাভ কৰাৰ বিপৰীতে কংগ্ৰেছে ১৩১৮টা আৰু অগপই ৩৭৭টা ভোট লাভ কৰিবলৈহে সক্ষম হয়।
আনহাতে বিগত সময়ত কংগ্ৰেছৰ দখল থকা তথা খোদ ৰকিবুল হুছেইনে পৰিয়ালসহ ভোটদান কৰা গাঁও পঞ্চায়তটোৰ ৪নং ৱাৰ্ডত কংগ্ৰেছে ১৩৪টা ভোট লাভ কৰাৰ বিপৰীতে বিজেপিয়ে ৪৮২টা ভোট লাভ কৰে। আনহাতে উক্ত ৱাৰ্ডটোত অগপই মাত্ৰ ১২টা ভোটহে লাভ কৰিবলৈ সক্ষম হয়।
বিজেপিৰ এই জয়ত কালি দলটোৰ স্থানীয় কৰ্মী তথা সমৰ্থকসকলে আমনিত ফটকা ফুতাই বিজয় উৎসৱ পালন কৰে।
