আন্তৰ্জাতিক অপৰাধ আদালতত তালিবানৰ বিৰুদ্ধে গোচৰ তৰিলে নিহত ফটো সাংবাদিক ডেনিছ ছিদ্দিকৰ পৰিয়ালে
মৃত ভাৰতীয় ফটো সাংবাদিক ডেনিছ ছিদ্দিকৰ পিতৃ-মাতৃয়ে আন্তৰ্জাতিক অপৰাধ আদালতত তালিবানৰ বিৰুদ্ধে গোচৰ ৰুজু কৰিছে।
পুলিৎজাৰ বিজয়ী ভাৰতীয় ফটো সাংবাদিক ডেনিছ ছিদ্দিকে যোৱা বৰ্ষত আফগানিস্তানত যুদ্ধৰ কভাৰ কৰি থকা সময়ত তালিবানে হত্যা কৰিছিল।
ডেনিছ ছিদ্দিকৰ পিতৃ-মাতৃয়ে তেওঁলোকৰ পুত্ৰৰ মৃত্যুৰ তদন্ত বিচাৰি আন্তৰ্জাতিক অপৰাধ আদালতত গোচৰ দাখিল কৰিছে।
“১৬ জুলাই, ২০২১ ত তালিবানৰ দ্বাৰা নিৰ্যাতিত আৰু হত্যা কৰা পুলিৎজাৰ বিজয়ী ফটো সাংবাদিক ডেনিছ চিদ্দিকীৰ পিতৃ-মাতৃ অধ্যাপক আখটাৰ ছিদ্দিক আৰু শ্বাহিদা আখটাৰে তেওঁৰ হত্যাৰ তদন্ত আৰু তালিবানৰ নেতা আৰু উচ্চ পৰ্যায়ৰ কমাণ্ডাৰসহ দায়ী সকলক ন্যায়ৰ সন্মুখীন কৰিবলৈ আন্তৰ্জাতিক অপৰাধ আদালতৰ অধিবক্তাৰ ওচৰত অভিযোগ দাখিল কৰিছে। ” এটা বিবৃতিত এইদৰে উল্লেখ কৰা হৈছে।
পৰিয়ালটোক প্ৰতিনিধিত্ব কৰা অধিবক্তা অভি সিঙে কয়, “২০২১ চনৰ ১৬ জুলাইত পুলিৎজাৰ বিজয়ী ভাৰতীয় ফটো সাংবাদিক ডেনিছ ছিদ্দিকক তালিবানৰ দ্বাৰা অত্যাচাৰ আৰু হত্যা কৰা হৈছিল।”
উল্লেখ্য যে যোৱা বৰ্ষৰ জুলাইত কান্দাহাৰ চহৰৰ স্পিন বোল্ডাক জিলাত আফগান নিৰাপত্তা বাহিনী আৰু তালিবান যুঁজাৰুৰ মাজত হোৱা সংঘৰ্ষৰ কভাৰ কৰাৰ সময়ত ডেনিছ ছিদ্দিক নিহত হৈছিল।
তাৰ পিছতে লক্ষণীয়ভাৱে, তালিবানে যোৱা বৰ্ষৰ আগষ্টত গণতান্ত্ৰিকভাৱে নিৰ্বাচিত চৰকাৰক উৎখাত কৰাৰ পিছত আফগানিস্তানত ক্ষমতা দখল কৰিছিল।
স্মৰ্তব্য যে পুলিৎজাৰৰ দৰে সন্মানীয় বঁটা বিজয়ী ডেনিছ ছিদ্দিক আন্তৰ্জাতিক সংবাদ সংস্থা ৰয়টাৰৰ এজন ফটো সাংবাদিক আছিল।