‘এদিন স্বৰ্গৰ কোনোবা এখন ঠাইত মাৰাডোনাৰ সৈতে ফুটবল খলিম’, ব্ৰাজিলৰ মহান ফুটবলাৰ পেলেই কিংবদন্তি মাৰাডোনাৰ মৃত্যুত শোকপ্ৰকাশ কৰি এনেদৰে শ্ৰদ্ধাঞ্জলি জ্ঞাপন কৰে।
বুধবাৰে হৃদৰোগত আক্ৰান্ত হৈ ‘ফুটবলৰ ৰাজপুত্ৰ’ মাৰাডোনাৰ মৃত্যু হয়।
এই খবৰ বিয়পি পৰাৰ পিছতে শোকত ম্ৰিয়মান হৈ পৰে বিশ্বৰ ক্ৰীড়াপ্ৰেমীৰ লগতে ব্ৰাজিলৰ মহান ফুটবলাৰ পেলে।
তেওঁ এটা টুইটেৰে শোকপ্ৰকাশ কৰে। টুইটটোত কয়, ‘অত্যন্ত দুখজনক খবৰ। মই এজন ভাল বন্ধু আৰু বিশ্ববাসীয়ে এগৰাকী মহান খেলুৱৈক হেৰুৱালে। বহু ক’বলগীয়া আছে কিন্তু বৰ্তমান এয়াই ক’ব বিচাৰো যে ভগৱানে পৰিয়ালৰ লোকক শক্তি দিয়ক’।
তেওঁ লগতে কয়, ‘আশা কৰো কোনোবা এটা দিনত আমি আকাশৰ কোনোবা এটা স্থানত ফুটবল খেলিম’।
উল্লেখ্য যে পেলে আৰু মাৰাডোনা ইজনে সিজনৰ খেলৰ প্ৰশংসক আছিল। দুয়োৰে মাজত বয়সৰ যথেষ্ট পাৰ্থক্য আছিল যদিও দুয়োৰে সম্পৰ্ক কিন্তু আছিল মধুৰ।
ফুটবল খেলক অধিক জনপ্ৰিয় তথা মনোমোহা কৰাৰ ক্ষেত্ৰত এই দুয়োজন খেলুৱৈৰ অৰিহনা অস্বীকাৰ্য।
২০০১ চনত ক্ৰীড়াৰ ইতিহাসত দুই সৰ্বশ্ৰেষ্ঠ খেলুৱৈ হিচাপে ব্ৰাজিলৰ পেলেৰ সৈতে মাৰাডোনাক অন্তৰ্ভুক্ত কৰিছিল।
উল্লেখ্য যে ১৯৮৬ চনৰ বিশ্বকাপত ইংলেণ্ডৰ বিৰুদ্ধে ‘ঈশ্বৰৰ হাত’ শীৰ্ষক গ’লটোৰ বাবে মাৰাডোনা তীৰ্যক সমালোচনাৰ সন্মুখীন হৈছিল যদিও একেখন মেচতে এনেকুৱা এটা গ’ল দিছিল যিটো গ’ল আজিও বিশ্বকাপ ইতিহাসৰ সৰ্বশ্ৰেষ্ঠ গ’ল হিচাপে গণ্য কৰা হয়।
