ৰাজ্যৰ বিভিন্ন জিলাৰ বহু লোকে ভিৰ কৰিছে দুধনৈত। বিভিন্ন জন আহিছে দুধনৈ থানালৈ। এইদৰে চুৰি হোৱা নিজৰ আপোন দুচকীয়া বাহনখন বিচাৰি থানা চৌহদত ভিৰ কৰিছে বাইকৰ গৰাকী সকলে৷
দুধনৈ আৰক্ষী থানাৰ ভাৰপ্ৰাপ্ত আৰক্ষী বিষয়া মুকুট কাকতিৰ নেতৃত্বত এতিয়ালৈকে উদ্ধাৰ হৈছে ৭০খনকৈ অধিক চুৰি বাইক৷
এক বৃহৎ আন্তঃৰাজ্যিক গাড়ী চুৰি চক্ৰ উৎখাত কৰি আৰক্ষীয়ে গ্ৰেপ্তাৰ কৰিছে ২৬টাকৈ গোভাইত বাইক চোৰ ৷
তাৰ পিছতে চুৰি বাইকৰ উজান উঠিছে দুধনৈ থানাত ৷ প্ৰতিদিনেই উদ্ধাৰ হৈ আছে বাইক। দুধনৈ আৰক্ষীয়ে বৃহৎ সংখ্যক চুৰি বাইক উদ্ধাৰ কৰাৰ খবৰ লাভ কৰা বুলি জানিব পাৰি ৰাজ্যৰ বিভিন্ন জিলাৰ পৰা হেৰোৱা বা চুৰি হোৱা বাইক বিচাৰি দুধনৈ থানালৈ সোঁত বৈছে বহু লোকৰ।
এনেদৰে বাইক সমূহৰ মাজত নিজৰ আপোন বাইকখন বিচাৰি ফুৰিছে বহুতে ৷ বহু দূৰ দূৰণিৰ পৰা লোক সকল দুধনৈলৈ আহিছে ৷ তাৰ মাজতে কোনোৱে হেৰোৱা বাইক বিচাৰি পাই উৎফুল্লিত হোৱাৰ বিপৰীতে বহুতে আকৌ বাইকখন বিচাৰি নাপাই দুখ মনেৰে ঘৰলৈ উভতিছে ৷
উল্লেখ্য যে, অসম আৰক্ষীৰ ইতিহাসতে এনেধৰণে বৃহৎ সংখ্যক চুৰি বাইক উদ্ধাৰ হোৱাৰ নজিৰ এতিয়ালৈকে নাই, যাৰ বাবে অসম আৰক্ষীৰ সঞ্চালক প্ৰধানৰ লগতে মুখ্যমন্ত্ৰী গৰাকীয়েও এই সফল অভিযান চলোৱা আৰক্ষী বিষয়া মুকুট কাকতিক উৎসাহ যোগোৱাৰ লগতে অভিনন্দনো জনাইছে ৷
