১৩ ফেব্ৰুৱাৰি অৰ্থাৎ বুধবাৰে নাগৰিকত্ব সংশোধনী বিধেয়কখন ৰাজ্যসভাত উত্থাপন নোহোৱাৰ পাছত আজি কৃষক মুক্তিৰ নেতা অখিল গগৈ নেতৃত্বাধীন ৭০ সংগঠনে গুৱাহাটীত এক সংবাদমেল সম্বোধন কৰি সংগ্ৰামত সহযোগ কৰা প্ৰতিজন ব্যক্তি, দল-সংগঠনকে অভিনন্দন জ্ঞাপন কৰে।
গান্ধীবস্তিৰ কৃষক মুক্তি সংগ্ৰাম সমিতিৰ মুখ্য কাৰ্যালয়ত আয়োজিত সংবাদমেলত কৃষক নেতা গগৈয়ে এই জয় বিজেপিৰ বিৰুদ্ধে অসম তথা উত্তৰ-পূবৰ সংগ্ৰামী ৰাইজৰ বিজয় বুলি মন্তব্য কৰে।
‘বিজেপিয়ে কোৱা শৰাইঘাটৰ যুঁজ প্ৰকৃততে এইখনেই। আমি ৰামসিংহক পৰাজিত কৰিলো। ইয়াৰ সেনানি অসম আৰু উত্তৰ-পূবৰ ৰাইজ। কিন্তু এইখন শেষ যুঁজ নহয়’। এই মন্তব্য অখিল গগৈৰ।
বি পি এফে এই বিধেয়কখনৰ বিৰুদ্ধাচৰণ নকৰাতো অতিকৈ দুৰ্ভাগ্যজনক বুলি মন্তব্য কৰি তেওঁ কয়, ‘বিধেয়ক বিৰোধী আন্দোলনত বড়ো ৰাইজ তথা এবছুৱে সহায় কৰিলে কিন্তু বি পি এফে সহায় নকৰিলে’।
বিধেয়ক বিৰোধী সংগ্ৰামখনত অসমীয়া জাতিৰ শত্ৰু-মিত্ৰ চিনাকী হোৱা বুলি মন্তব্য কৰাৰ লগতে বিধেয়ক বিৰোধী আন্দোলনটো গ্ৰুপিং বিৰোধী সংগ্ৰামৰ সৈতে তুলনা কৰে অখিল গগৈয়ে।
আনহাতে এই সংবাদমেলতে কৃষক নেতাগৰাকীয়ে আগন্তুক নিৰ্বাচনত বিজেপিক পৰাজিত কৰিবলৈ সকলোকে সংকল্প ল’বলৈ আহ্বান জনায়। তদুপৰি বিজেপি চৰকাৰে জাৰি কৰা পাৰপত্ৰ(ভাৰত প্ৰৱেশ) জাননি আৰু দীৰ্ঘকালীন ভিচাৰ বিৰুদ্ধে ৭০ সংগঠনে উচ্চতম ন্যায়ালয়ৰ দ্বাৰস্থ হ’ব বুলিও সদৰী কৰে।
ইফালে সংবাদমেলত উপস্থিত থকা আন এগৰাকী নেতা তথা অসম জাতীয়তাবাদী যুৱ ছাত্ৰ পৰিষদৰ সাধাৰণ সম্পাদক পলাশ চাংমায়ে সকলোকে অভিনন্দন জ্ঞাপন কৰি কয়, ‘যোৱা আঢ়ৈ বছৰে যুজঁ দিয়া যুজঁখন অৱশেষত ৰাইজৰ প্ৰতিবাদত নাগৰিকত্ব সংশোধনী বিধেয়ক ৰাজ্যসভাত উত্থাপন নহ’ল’।
