সশস্ত্ৰ বাহিনী বিশেষ ক্ষমতা আইনৰ বিৰুদ্ধে জাগি উঠিছে নাগালেণ্ডৰক জনতা। হঠকাৰী আইন খনৰ বিৰুদ্ধে পুনৰ ৰাজপথলৈ ওলাই আহিছে ৰাজ্য খনৰ বিভিন্ন দল-সংগঠনৰ নেতা-কৰ্মী।
আজি এই আইনৰ বিৰুদ্ধে ডিমাপুৰৰ পৰা কোহিমালৈ উলিওৱা হৈছে এক পদযাত্ৰা।
এই পদযাত্ৰাত ভাগ লৈছে শতাধিক লোকে। আজি পদযাতাকাৰীসকলে নাগালেণ্ডৰ পিফেমাত গৈ উপস্থিত হয়।
কাইলৈ পিফেমাৰ পৰা কোহিমাস্থিত ৰাজভৱনলৈ পদযাত্ৰাকাৰীসকল যাব আৰু আফস্পা বাতিলকে ধৰি সেনাৰ অত্যাচাৰ বন্ধ কৰা, অটিং গণহত্যা আৰু অন্যান্যৰ ভুক্তভোগীসকলৰ বাবে ন্যায় প্ৰাপ্তিৰ দাবীৰে প্ৰতিবাদ সাৱস্ত্য কৰিব।
উল্লেখ্য ৭৫ কিলোমিটাৰ দূৰত্ব অতিক্ৰমি কৰি দুদিনীয়া পদযাত্ৰাৰে প্ৰতিবাদকাৰীসকলে এই প্ৰতিবাদ সাৱস্ত্য কৰিছে। সোমবাৰে পুৱা ৬ বজাত এই পদযাত্ৰা আৰম্ভ হয়।
পিফেমাত নিশা কটোৱাৰ পিছত, পদযাত্ৰাটো মঙলবাৰে পুৱা ৬ বজাত পুনৰ আৰম্ভ হ’ব আৰু কোহিমা অভিমুখে আগবাঢ়িব।
স্মাৰকপত্ৰ দাখিল কৰিবলৈ ৰাজভৱনলৈ যোৱাৰ আগতে কেইবাজনো স্থানীয় লোক আৰু সংগঠনে পদযাত্ৰাটোত চামিল হ’ব বুলি জানিব পৰা গৈছে।
বহু বিতৰ্কিত সশস্ত্ৰ বাহিনী (বিশেষ) ক্ষমতা আইন বাতিলৰ বাবে নাগালেণ্ডকে ধৰি উত্তৰ-পূৰ্বাঞ্চলৰ কেইবা খনো ৰাজ্যই দাবী জনাই অহাৰ মাজতে কেন্দ্ৰীয় গৃহ দপ্তৰে অলপতে পুনৰ নাগালেণ্ডত ছমাহৰ বাবে বৃদ্ধি কৰিছে সশস্ত্ৰ বাহিনী (বিশেষ) ক্ষমতা আইনৰ সময়সীমা।
সশস্ত্ৰ বাহিনী (বিশেষ) ক্ষমতা আইনে সামৰিক বাহিনীক “সন্ত্ৰাস বিধ্বস্ত এলেকা” বুলি ঘোষণা কৰা যিকোনো স্থানত মুক্তভাৱে কাম কৰাৰ ব্যাপক ক্ষমতা প্ৰদান কৰি আহিছে।
এই আইনৰ অচিলালৈয়ে শেহতীয়াকৈ ৪ ডিচেম্বৰত নাগালেণ্ডত সেনাৰ পেৰা স্পেচিয়েল ফ’ৰ্চে ১৩ জন নাগৰিকক হত্যা কৰিছিল। যি ঘটনাই সমগ্ৰ দেশজুৰি প্ৰতিক্ৰিয়াৰ সৃষ্টি কৰিছিল। লগে লগে পুনৰ সজোৰে উত্থাপন হৈছিল সশস্ত্ৰ বাহিনী (বিশেষ) ক্ষমতা আইন বাতিলৰ দাবী।
শেহতীয়াকৈ নাগালেণ্ডৰ মুখ্যমন্ত্ৰী নেইফিউ ৰিঅ’ই গৃহমন্ত্ৰী অমিত শ্বাহৰ সৈতে কৰা আলোচনাৰ অন্তত
নাগালেণ্ডৰ পৰা বিতৰ্কিত সশস্ত্ৰ বাহিনী বিশেষ ক্ষমতা আইন ১৯৫৮, চমুকৈ আফস্পা বাতিলৰ আশ্বাস দিছিল গৃহমন্ত্ৰীগৰাকীয়ে।
অমিত শ্বাহে কৈছিল যে আইনখন বাতিলৰ সম্পৰ্কত এখন সমিতি গঠন কৰা হ’ব। সমিতিখনে ৪৫ দিনৰ ভিতৰত এটা ৰিপ’ৰ্ট প্ৰদান কৰিব ।
নাগালেণ্ডৰ মন জিলাত সংঘটিত হোৱা নৃশংস হত্যাকাণ্ডটো আফস্পা আইনৰ জৰিয়তেই কৰা হৈছিল। তাৰ পাছৰে আফস্পা বাতিলৰ দাবীত ৰাজ্যখন উত্তাল হৈ আছে। ২০ ডিচেম্বৰত নাগালেণ্ডৰ বিধানসভাতো আফস্পা বাতিলৰ দাবীত এটা প্ৰস্তাৱ গ্ৰহণ কৰা হৈছিল।
কিন্তু কেৱল নাগালেণ্ডেই নহয়, মেঘালয়ৰ মুখ্যমন্ত্ৰী কনৰাড চাংমাইও আফস্পা বাতিলৰ দাবী জনাই আহিছে।
চাংমাই শেহতীয়াকৈ কয় যে উক্ত আইনখনে উত্তৰ পূবত শান্তিৰ পৰিৱেশৰ সলনি অশান্তিকৰ পৰিস্থিতিৰ সূচনা কৰি আহিছে।
নাগালেণ্ড, মেঘালয়ৰ উপৰিও উত্তৰপূবৰ প্ৰায় আটাইকেইখন ৰাজ্যৰ জনসাধাৰণে এই আইন বাতিল কৰিবলৈ দাবী জনায় আহিছে। অসমতো এই আইনৰ ফলত নিৰীহ জনসাধাৰণে সেনাবাহিনীৰ নিৰ্যাতন সহিব লগা হৈছিল।
