২০২৫ চনৰ ১ মে’ৰ পৰা ৪ মে’লৈ মুম্বাইত অনুষ্ঠিত হ’বলগীয়া আগন্তুক বিশ্ব দৃশ্য শ্ৰাব্য মনোৰঞ্জন সন্মিলন (WAVES) ২০২৫ৰ এক আভাস প্ৰদানৰ উদ্দেশ্যে বৃহস্পতিবাৰে গুৱাহাটীৰ সংবাদ মাধ্যমৰ প্ৰতিনিধিসকলৰ সৈতে প্ৰেছ ইনফৰ্মেশ্যন ব্যুৰো (পিআইবি), গুৱাহাটী কাৰ্যালয়ে ‘বাৰ্তা’ শীৰ্ষক এখন কৰ্মশালা অনুষ্ঠিত কৰে।
পি আই বিৰ উত্তৰ-পূব মণ্ডলৰ অতিৰিক্ত সঞ্চালক প্ৰধান কৃপা শংকৰ যাদৱৰ অধ্যক্ষতাত কৰ্মশালাখন অনুষ্ঠিত হয়। ভাষণ প্ৰসংগত যাদৱে বিশ্বৰ মঞ্চত ভাৰতৰ দৃশ্য-শ্ৰাব্য খণ্ডৰ ক্ৰমবৰ্ধমান গুৰুত্ব সন্দৰ্ভত আলোকপাত কৰি উত্তৰ-পূৰ্বাঞ্চলৰ আঞ্চলিক প্ৰতিভাৰ প্ৰচাৰ আৰু গল্প কথনৰ প্ৰসাৰতাৰ ক্ষেত্ৰত সংবাদ মাধ্যমে ল’ব পৰা গুৰুত্বপূৰ্ণ ভূমিকাৰ বিষয়ে উল্লেখ কৰে।
কৰ্মশালা খনত মূল বক্তব্য প্ৰদান কৰে পিআইবিৰ উপ-সঞ্চালক পাৱনী গুপ্তাই। গুপ্তাই ৱেভছ শীৰ্ষ সন্মিলন আৰু ইয়াৰ বিভিন্ন স্তম্ভৰ বিষয়ে বিশদভাৱে আলোচনা কৰে। তেওঁ অনুষ্ঠানটোৰ উদ্দেশ্য, গাঁথনি আৰু আন্তঃৰাষ্ট্ৰীয় পৰিসৰৰ বিষয়ে এক আভাস প্ৰদান কৰাৰ লগতে সন্মিলনৰ বিশদ সময়সূচী তথা দেশৰ বিভিন্ন প্ৰান্তৰ সমল সৃষ্টিকৰ্তা, প্ৰযোজক আৰু সাংস্কৃতিক ক্ষেত্ৰৰ অগ্ৰণী ব্যক্তিসকলৰ বাবে অনুষ্ঠানটোৱে মুকলি কৰা সুযোগসমূহৰ বিষয়েও সাংবাদিকসকলক অৱগত কৰে।
গুপ্তাই লগতে কয় যে ৱেভছ ২০২৫ হৈছে তথ্য আৰু সম্প্ৰচাৰ মন্ত্ৰালয়ৰ দ্বাৰা সমৰ্থনত আয়েজিত অনুষ্ঠিত এক বিশেষ অনুষ্ঠান। ৱেভছ ২০২৫ক চলচ্চিত্ৰ, টেলিভিছন, অ’টিটি, এনিমেচন, গেমিং আৰু অত্যাধুনিক প্ৰযুক্তিকে ধৰি দৃশ্য-শ্ৰাব্য উদ্যোগৰ অভিসৰণ উদযাপন কৰাৰ এক বিশ্বজনীন মঞ্চ হিচাপে কল্পনা কৰা হৈছে বুলি তেওঁ কয়। এই সন্মিলনৰ লক্ষ্য হৈছে ভাৰতীয় সংবাদ মাধ্যমৰ বিশ্বব্যাপী বজাৰ অংশীদাৰিত্ব বৃদ্ধি কৰি ভাৰতক গ্ল’বেল কন্টেন্ট হাব আৰু কন্টেন্টৰ অগ্ৰণী ৰপ্তানিকাৰক হিচাপে গঢ়ি তোলা।
কৰ্মশালাত ভাষণ আগবঢ়াই কেন্দ্ৰীয় চলচ্চিত্ৰ প্ৰমাণীকৰণ ব’ৰ্ডৰ দীপাংকৰ গগৈয়ে আগন্তুক সন্মিলন খনত উত্তৰ-পূৰ্বাঞ্চলৰ অসংখ্য শিল্পীৰ অংশগ্ৰহণৰ বিষয়ে সাংবাদিকসকলক অৱগত কৰে। তেওঁ কয় যে এই অনুষ্ঠান হৈছে আঞ্চলিক প্ৰতিভাৰ অধিক অন্তৰ্ভুক্তি আৰু ৰাষ্ট্ৰীয় সাংস্কৃতিক ক্ষেত্ৰত প্ৰতিনিধিত্ব কৰাৰ দিশত এক গুৰুত্বপূৰ্ণ পদক্ষেপ।পিআইবি, দূৰদৰ্শন নিউজৰ লগতে কেইবাটাও আঞ্চলিক সংবাদমাধ্যমৰ প্ৰতিনিধিসকলেও এই কৰ্মশালাত অংশগ্ৰহণ কৰে। কৰ্মশালাৰ সামৰণি পৰে এক আকৰ্ষণীয় পাৰস্পৰিক মত-বিনিময় কাৰ্যসূচীৰ মাজেৰে। য’ত সাংবাদিকসকলে ৱেভছ শীৰ্ষ সন্মিলন আৰু ইয়াৰ বা-বাতৰি প্ৰচাৰৰ বিষয়ে নিজৰ দৃষ্টিভংগী ব্যক্ত কৰাৰ লগতে এই সন্দৰ্ভত জানিবলগীয়া নানান প্ৰশ্ন কৰে।
