বহি:ৰাজ্যৰ পৰা গাহৰি সৰবৰাহ কাৰ্য বন্ধ, প্ৰতিষেধক যোগান ধৰিবলৈ চৰকাৰলৈ আহ্বান গাহৰি পালকৰ
ছোৱাইন ফ্লুৰ প্ৰাদুৰ্ভাৱে ৰাজ্যৰ কেইবাখনো জিলাৰ গাহৰি পালক সকলৰ বাবে অশনি সংকেত কঢ়িয়াই আনিছে। ছোৱাইন ফ্লুৰ ভয়াৱহতাৰ বাবে তীব্ৰ সংকটৰ সন্মুখীন হৈছে ৰাজ্যৰ গাহৰি পালক সকল।
এনে সময়তে টীয়কৰ আদৰ্শ কৃষক তথা গাহৰি পালক নৱনিধি গগৈয়ে এই সময়ত সকলো গাহৰি পালকক সংশয়ৰ পৰিৱৰ্তে সতৰ্কতা মূলক ব্যৱস্থা গ্ৰহণত গুৰুত্ব প্ৰদান কৰিবলৈ আহ্বান জনায়।
নিজৰ গাহৰি গড়ালটো পৰিস্কাৰ পৰিচন্ন কৰি ৰখাৰ লগতে মহ, মাখি আদিয়ে যাতে অত্যাচাৰ কৰিব নোৱাৰে তাৰ বাবে কেতবোৰ ব্যৱস্থা গাহৰি পালক সকলে নিজাববীয়াকৈ গ্ৰহণ কৰিবলৈ আহ্বান জনায় নৱনিধি গগৈয়ে।
গ্ৰাম্য অৰ্থনীতিক তৰাম্বিত কৰাত গাহৰি পালক সকলে বলিষ্ঠ ভূমিকা গ্ৰহণ কৰাৰ প্ৰচুৰ সম্ভাৱনা আছে বুলি উল্লেখ কৰি আদৰ্শ কৃষক গগৈয়ে গাহৰি পালকসকললৈ অহা এই অভাৱনীয় পৰিস্থিতিৰ সৈতে মোকাবিলা কৰিবলৈ তথা এই বৃত্তিৰ পৰা আঁতৰি নাযাবলৈ আহ্বান জনায়।
বহি:ৰাজ্যৰ পৰা সৰবৰাহ হৈ থকা গাহৰিৰ দেহত বেমাৰৰ বীজাণু থাকিব পাৰে বুলি আশংকা ব্যক্ত কৰি গগৈয়ে বহি:ৰাজ্যৰ গাহৰি সৰবৰাহ কাৰ্য বন্ধ কৰাৰ বাবে ৰাজ্য চৰকাৰক আহ্বান জনোৱাৰ লগতে পৰ্যাপ্ত প্ৰতিষেধক যোগান ধৰাৰ আহ্বান জনায়।