দেওবাৰে পুৱা এছচিঅ’ৰ বৈঠকৰ পূৰ্বে বহু চৰ্চিত ভাৰত-চীন দ্বিপাক্ষিক বৈঠক অনুষ্ঠিত হয়। চীনৰ বন্দৰ চহৰ টিয়ানজিনত ভাৰতৰ প্ৰধানমন্ত্ৰী নৰেন্দ্ৰ মোডী আৰু চীনৰ ৰাষ্ট্ৰপতি ছি জিনপিঙ বৈঠকত মিলিত হয়।
জানিব পৰা মতে, বৈঠকত দক্ষিণ এছিয়াৰ দুই গুৰুত্বপূৰ্ণ শক্তিৰ মাজত সীমান্ত আৰু অৰ্থনীতিকে ধৰি বিভিন্ন বিষয়ৰ ওপৰত আলোচনা কৰা হয়। বৈঠকৰ অন্তত মোদীয়ে সংবাদমেল অনুষ্ঠিত কৰে। আলোচনাৰ অন্তত দুয়োপক্ষই নিজৰ সম্পৰ্কক আগুৱাই নিয়াৰ প্ৰতিশ্ৰুতি দিছে বুলিও তেওঁ কয়।
প্ৰধানমন্ত্ৰীয়ে কয়, “যোৱা বছৰ কাজানত আমাৰ মাজত অতি ফলপ্ৰসূ আলোচনা হৈছিল যিয়ে আমাৰ সম্পৰ্কক ইতিবাচক দিশত আগুৱাই লৈ গৈছে। সীমান্তৰ পৰা সৈন্য প্ৰত্যাহাৰৰ পিছত শান্তি আৰু স্থিতিশীলতাৰ পৰিৱেশৰ সৃষ্টি হৈছে।”
মোদীয়ে লগতে কয়, ‘সীমান্ত বিষয়ত আমাৰ বিশেষ প্ৰতিনিধিৰ মাজত এক চুক্তি হৈছে। কৈলাশ মানসৰোৱৰ যাত্ৰা পুনৰ আৰম্ভ হৈছে। দুয়োখন দেশৰ মাজত প্ৰত্যক্ষ বিমান সেৱাও পুনৰ আৰম্ভ হৈছে। আমাৰ সহযোগিতাৰ সৈতে দুয়োখন দেশৰ ২৮০ কোটি জনসাধাৰণৰ স্বাৰ্থ জড়িত হৈ আছে। ইয়াৰ ফলত সমগ্ৰ মানৱতাৰ কল্যাণৰ বাট মুকলি হ’ব। পাৰস্পৰিক বিশ্বাস, সন্মান আৰু সংবেদনশীলতাৰ ভিত্তিত আমাৰ সম্পৰ্কক আগুৱাই নিয়াৰ বাবে আমি প্ৰতিশ্ৰুতিবদ্ধ।”
ইয়াৰ উপৰিও প্ৰধানমন্ত্ৰী মোদীয়ে চীনক এছচিঅ’ত সফল অধ্যক্ষতাৰ বাবে অভিনন্দন জ্ঞাপন কৰে। চীন ভ্ৰমণলৈ আমন্ত্ৰণ জনোৱাৰ বাবে আৰু দ্বিপাক্ষিক বৈঠকৰ বাবেও তেওঁ জিনপিঙক ধন্যবাদ জনায়।
