আলিগড় মুছলিম বিশ্ববিদ্যালয়ৰ শতবৰ্ষ উদযাপনৰ আজিৰ দিনটো ইতিহাস হৈ ৰ’ব। কিয়নো ৫৬ বছৰৰ পিছত আজি কোনো প্ৰধান মন্ত্ৰীয়ে ইয়াক সম্বোধন কৰিব।
প্ৰধান মন্ত্ৰী নৰেন্দ্ৰ মোদীয়ে বিশ্ববিদ্যালয়ৰ ছাত্ৰ-ছাত্ৰীসকলক আজি অনলাইনযোগে সম্বোধন কৰিব। এই সমাৰোহত প্ৰধান মন্ত্ৰীৰ উপৰি কেন্দ্ৰীয় শিক্ষা মন্ত্ৰী ৰমেশ পোখৰিয়াল নিশংকেও অংশ ল’ব।
উল্লেখ্য যে ইয়াৰ পূৰ্বে ১৯৬৪ চনত তেতিয়াৰ প্ৰধান মন্ত্ৰী লাল বাহাদুৰ শাস্ত্ৰীয়ে এই বিশ্ববিদ্যালয়লৈ আহিছিল।
তেতিয়া লাল বাহাদুৰ শাস্ত্ৰীয়ে বিশ্ববিদ্যালয়ৰ সমাৱৰ্তন অনুষ্ঠানত অংশগ্ৰহণ কৰিছিল।
ইফালে আজিৰ এই ঐতিহাসিক অনুষ্ঠানৰ স্মৰণত প্ৰধান মন্ত্ৰী মোদীয়ে এক বিশেষ ডাক টিকট মুকলি কৰিব।
বিশ্ববিদ্যালয়ৰ আমন্ত্ৰণ প্ৰধান মন্ত্ৰী মোদীয়ে গ্ৰহণ কৰাৰ পিছত বিশ্ববিদ্যালয়ৰ ভিচিয়ে তেওঁক কৃতজ্ঞতা জ্ঞাপন কৰে।
উল্লেখ্য যে বিশ্ববিদ্যালয়খনৰ একাংশ প্ৰাক্তন ছাত্ৰ-ছাত্ৰীয়ে শতবৰ্শৰ অনুষ্ঠানত প্ৰধান মন্ত্ৰীৰ অংশগ্ৰহণৰ তীব্ৰ বিৰোধিতা কৰিছে।
প্ৰধান মন্ত্ৰীৰ অংশ গ্ৰহণৰ বিৰোধিতাত বিশ্ববিদ্যালয় চৌহদৰ বাহিৰত বিভিন্ন শ্লোগান আওৰাই প্ৰতিবাদ সাব্যস্ত কৰিছে ছাত্ৰ-ছাত্ৰীসকলে।
ছাত্ৰ-ছাত্ৰীৰ বিৰোধিতা দেখি বিশ্ববিদ্যালয় চৌহদত ইতিমধ্যে নিৰাপত্তা ব্যৱস্থা কটকটীয়া কৰাৰ লগতে আৰক্ষী বাহিনী মোতায়েন কৰিছে।
