কেন্দ্ৰীয় গৃহ নিৰ্মাণ আৰু নগৰ পৰিক্ৰমা মন্ত্ৰালয়ে প্ৰধানমন্ত্ৰী ষ্ট্ৰীট ভেণ্ডৰ আত্মনিৰ্ভৰ নিধি (পি এম স্বনিধি) আঁচনিৰ অধীনত, ২০২৪ চনৰ ৮ ডিচেম্বৰলৈকে মুঠ ১৩,৪২২ কোটি টকাৰ ৯.৪৩ লাখ লোকক ঋণ প্ৰদান কৰিছে।
সোমবাৰে ৰাজ্যসভাত এক প্ৰশ্নৰ লিখিত উত্তৰত এই তথ্য প্ৰদান কৰে গৃহ নিৰ্মাণ আৰু নগৰ পৰিক্ৰমা ৰাজ্যিক মন্ত্ৰী টোখান সাহুৱে।
২০২০ চনত ক’ভিড-১৯ মহামাৰীৰ সময়ত আৰম্ভ হোৱা পিএম স্বনিধি আঁচনিৰ জৰিয়তে চহৰৰ ৰাজপথৰ ব্যৱসায়ীসকলক তেওঁলোকৰ ব্যৱসায়ৰ সহায়ৰ বাবে ৫০ হাজাৰ টকা পৰ্যন্ত সূত বিহীন ঋণ প্ৰদান কৰা হয়। বৰ্তমানলৈকে এই ঋণ ৪.০৩ লাখ হিতাধিকাৰীয়ে পৰিশোধ কৰিছে।
মন্ত্ৰীগৰাকীয়ে লগতে উল্লেখ কৰে যে এই ঋণ প্ৰদানৰ লগত জড়িত কোনো এজেন্সী বা কোম্পানীৰ বিৰুদ্ধে কোনো ধৰণৰ জালিয়াতি সম্পৰ্কীয় অভিযোগৰ খবৰ পোৱা নাই।
সাহুৱে তেওঁৰ বিবৃতিত উল্লেখ কৰে যে ৰাজ্যসমূহক বৃহৎ ৰাজ্য, পাহাৰীয়া আৰু উত্তৰ-পূবৰ ৰাজ্য, আৰু সৰু ৰাজ্য/ কেন্দ্ৰীয় শাসিত অঞ্চলত ভাগ কৰা হৈছে কাৰ্য্যক্ষমতা জোখাৰ বাবে। এই শ্ৰেণীসমূহৰ ভিত্তিত প্ৰতিখন ৰাজ্যক এটা বিতৰণ লক্ষ্য নিৰ্ধাৰণ কৰা হৈছে, আৰু সেই অনুসৰি তেওঁলোকৰ অগ্ৰগতিৰ মূল্যায়ন কৰা হয়।
২০২৪ চনৰ জুলাই মাহত মধ্যপ্ৰদেশে ‘শ্ৰেষ্ঠ প্ৰদৰ্শন কৰা ৰাজ্য’ শাখাত শীৰ্ষ প্ৰদৰ্শনকাৰী হিচাপে আত্মপ্ৰকাশ কৰে। পি এম স্বনিধি আঁচনি ৰূপায়ণৰ ক্ষেত্ৰত অসাধাৰণ প্ৰচেষ্টাৰ বাবে অসমে ‘শ্ৰেষ্ঠ প্ৰদৰ্শনকাৰী ৰাজ্য – উদ্ভাৱন আৰু শ্ৰেষ্ঠ পদ্ধতি বঁটা’ শাখাত দ্বিতীয় স্থান লাভ কৰে।
