বোকাখাতৰ সাপজুৰিত যোৱা ৮ অক্টোবৰত দুটি শিশুক সাপজুৰিৰ নিৱাসী পিন্টু চাহুয়ে শাৰীৰিক ভাৱে অত্যাচাৰ কৰা ঘটনা সন্দৰ্ভত সৃষ্টি হোৱা বিতৰ্ককলৈ বোকাখাত আৰক্ষীয়ে আজি এখন সংবাদ মেল আয়োজন কৰে।
ঘটনাক সন্দৰ্ভত একাংশ সংবাদ পত্ৰত ভুল বাতৰি পৰিবেশিত হোৱা বুলি সংবাদ মেলত আৰক্ষীয়ে সাংবাদিকক অৱগত কৰে।
উল্লেখযোগ্য যে, প্ৰহাৰৰ ঘটনা সন্দৰ্ভত শিশুদ্বয়ৰ পিতৃ সুশীল চৌধুৰীয়ে বোকাখাত আৰক্ষী থানাত এক গোচৰ ৰুজু কৰিছিল।
শুকুৰবাৰে সংবাদ মেলত বোকাখাত আৰক্ষী থানাৰ ভাৰপ্ৰাপ্ত বিষয়া ৰূপেশ্বৰ বৰা, যান বাহন শাখাৰ ভাৰপ্ৰাপ্ত বিষয়া গোবিন কাকতী, যানবাহন আৰক্ষী নিতুল ফুকন, জুৱেল গগৈৰ লগতে গোচৰীয় পক্ষৰ হৈ দিলীপ চৌধুৰীৰ সৈতে ভুক্তভোগী শিশু কেশৱ চৌধুৰী আৰু সোনাক্ষী চোধুৰী উপস্থিত থাকে।
আৰক্ষী আৰু ভূক্তভোগী শিশুদ্বয়ৰ মতে ঘটনাৰ দিনা দুৰ্গা পূজাৰ প্ৰতিমা বিসৰ্জন দিয়া চাবৰ বাবে লতাবাৰীলৈ যোৱা দুই শিশুক সামান্য এক কাৰণতে শাৰিৰীক ভাৱে প্ৰহাৰ কৰিছিল পিন্টু চাহুয়ে নামৰ ব্যক্তিগৰাকীয়ে।
অত্যাধিক মদ্যপান কৰি থকা পিন্টু চাহুক মাৰপিট কৰাৰৰ সময়ত স্থানীয় লোকে বাধা প্ৰদানো কৰিছিল আৰু সেই সময়ত পথৰ কাষত পৰি পিণ্টু চাহু আহত হ’বলগীয়া হৈছিল।
ঘটনাৰ পাচত পিন্টু চাহুৰ ভাতৃ সুনীল চাহুয়ে শিশুদ্বয়ৰ পিতৃ সুশীল চৌধুৰীৰ স্বৰস্বতী ষ্টোৰ নামৰ ব্যৱসায়িক প্ৰতিষ্ঠানখনৰ বিস্তৰ ক্ষতি সাধন কৰিছিল।
আনহাতে, ঘটনাস্থলীত আহত হোৱা পিন্টু চাহু বোকাখাত চিকিৎসালয়ত চিকিৎসাধীন হ’বলগীয়া হয়।
ব্যৱসায় প্ৰতিষ্ঠানৰ ক্ষতিসাধন আৰু নিজ পুত্ৰ আৰু কন্যাক আক্ৰমণ কৰা ঘটনা সন্দৰ্ভত বোকাখাত আৰক্ষী থানাত গোচৰ দিয়ে সুশীল চৌধুৰীয়ে।
একেটা ঘটনাক লৈ বোকাখাত থানাত অন্য এক গোচৰ তৰে পিন্টু চাহুৰ পৰিবাৰ সংগীতা চাহুয়ে ৷
আজিৰ সংবাদ মেলত বোকাখাত আৰক্ষীয়ে জনোৱা মতে এই ঘটনাৰ পাচতেই আৰক্ষীয়ে পিন্টু চাহুৰ ভাতৃ সুনীল চাহুক শাৰিৰীকভাৱে প্ৰহাৰ কৰা বুলি একাংশ সংবাদ মাধ্যমত ভুলকৈ বাতৰি প্ৰকাশ পায়।
সংবাদ মাধ্যমত প্ৰকাশিত বাতৰি সম্পূৰ্ণ ভিত্তিহীন আৰু মনে সজা আখ্যা দিয়ে বোকাখাত আৰক্ষীয়ে।
এনে ভিত্তিহীন বাতৰিয়ে জনমানসত বোকাখাতৰ ভাৱমুৰ্তি বিনষ্ট কৰা বুলিও সংবাদমেলত আৰক্ষীয়ে ক্ষোভ প্ৰকাশ কৰে।
আজিৰ সংবাদ মেলত সাপজুৰিৰ স্থানীয় লোকেও পিন্টু আৰু সুনীল চাহুৰ বিৰুদ্ধে সাংবাদিকৰ আগত ভাষ্য দাঙি ধৰে আৰু কনমানী শিশুক কৰা অত্যাচাৰৰ বাবে দোষীক শাস্তি প্ৰদানৰ দাবী তোলে।
মন কৰিবলগীয়া যে ঘটনাৰ সবিশেষ বৰ্ণনাৰে ভিডিঅ’ ৰেকৰ্ডিং আৰু পিন্টু চাহুয়ে কনমানী শিশুদ্বয়ক কৰা নিৰ্মম অত্যাচৰো নিজ মুখে দাঙি ধৰে ৷
