এক শিহৰণকাৰী ঘটনাই জোকাৰি গৈছে সমগ্ৰ চৰাইদেউ অঞ্চলকে।
চৰাইদেউৰ চাহ বাগিচা অঞ্চলৰ পৰা নিশা শুই থকা অৱস্থাতে সোমবাৰে দুৰ্বৃত্তই অপহৰণ কৰি নিয়া পাঁচ বছৰীয়া কন্যা শিশু এটিৰ মৃতদেহ আজি উদ্ধাৰ হয়।
মৃতদেহটোৰ কাষতে ৰঙা কাপোৰ, ছাঁই আদি পৰি ৰোৱালৈ চাই এয়া নৰবলিৰ ঘটনা হ’ব পাৰে বুলি আৰক্ষীয়ে সন্দেহ কৰিছে।
জানিব পৰা মতে কন্যা শিশুটি নিৰুদ্দেশ হোৱাৰ পিছতে চফ্ৰাই থানাত এই বিষয়ে এটা গোচৰ ৰুজু কৰা হৈছিল।
আজি আৰক্ষীয়ে স্থানীয় লোকৰ খবৰৰ ভিত্তিত চিংগুলী নৈৰ পাৰৰ পৰা কন্যা শিশুটিৰ ক্ষত-বিক্ষত মৃতদেহ উদ্ধাৰ কৰে।
আৰক্ষীয়ে জানিবলৈ দিয়া মতে এই ঘটনাৰ সৈতে জৰিত এজন তান্ত্ৰিকক ইতিমধ্যে গ্ৰেপ্তাৰ কৰা হৈছে আৰু মূল অভিযুক্তক কৰায়ত্ব কৰিবলৈ আৰক্ষীয়ে অভিযান অব্যাহত ৰাখিছে।
কন্যা শিশুটিৰ পিতৃৰ লগতে আন ১০ জন লোকক আৰক্ষীয়ে আটক কৰি জেৰা অব্যাহত ৰাখিছে।
আৰক্ষীৰ মতে এয়া অন্ধবিশ্বাসৰ বাবে কোনোৱাই সংঘটিত কৰা নৰবলিৰ ঘটনা হ’ব পাৰে।
ইয়াৰ পূৰ্বেও আদিবাসী লোকেৰে ভৰি থকা উক্ত অঞ্চলত এটি চাৰি বছৰীয়া কন্যা শিশুক অপহৰণ কৰি নি দুৰ্বৃত্তই ঈশ্বৰৰ নামত বলি দিয়াৰ ঘটনা ঘটিছিল।
আজিৰ এই ঘটনাটোৱে ৰাজ্যজুৰি চাঞ্চল্যৰ সৃষ্টি কৰা পৰিলক্ষিত হৈছে।
