ৰাইজৰ দলৰ প্ৰতিবাদত বাধা আৰক্ষী প্ৰশাসনৰ; সমদলকাৰীক আধা বাটতে আৱদ্ধ কৰিলে আৰক্ষীয়ে
অত্যাৱশ্যকীয় সামগ্ৰী, জীৱনদায়িনী ঔষধ, ৰন্ধন গেছ, পেট্ৰ’ল-ডিজেলকে ধৰি সকলো সামগ্ৰীৰ মূল্যবৃদ্ধিৰ প্ৰতিবাদত আজি শিৱসাগৰত ৰাইজৰ দল, কৃষক মুক্তি আৰু ছাত্ৰ মুক্তি সংগ্ৰাম সমিতিয়ে এক প্ৰতিবাদী কাৰ্যসূচী গ্ৰহণ কৰিছিল।
শিৱসাগৰৰ ষ্টেচন চাৰিআলিৰ টাই বিকাশ কেন্দ্ৰৰ পৰা সংগঠন কেইটাৰ কেইবা শতাধিক নেতা-কৰ্মীয়ে নগৰৰ মাজেদি এক বৃহৎ সমদল বাহিৰ কৰে। মূল্য বৃদ্ধি ৰোধ সমদল বাহিৰ কৰাৰ সময়তে আৰক্ষীয়ে প্ৰতিবাদকাৰী সকলক বাধা প্ৰদান কৰাত অধিক উত্তপ্ত হৈ পৰে পৰিস্থিতি।
প্ৰতিবাদকাৰী আৰু আৰক্ষীৰ মাজত তীব্ৰ বাক বিতণ্ডা হোৱাৰ লগতে হতাহতিৰো সৃষ্টি হয়। যোগান বিভাগ হায় হায় আদি শ্লগানেৰে ৰাজপথ উত্তাল কৰে প্ৰতিবাদকাৰী সকলে।
পৰিৱেশ অধিক উত্তপ্ত হৈ পৰাত সমদলটোক জিলা উপায়ুক্তৰ কাৰ্যালয়লৈ যাবলৈ নিদি দ’লমুখ চাৰিআলিতে আৰক্ষীয়ে বহু সময় ধৰি আবদ্ধ কৰি ৰাখে।
পিছত দ’লমুখ চাৰিআলিতে ৰাইজৰ দল, কৃষক মুক্তি আৰু ছাত্ৰ মুক্তি সংগ্ৰাম সমিতিৰ প্ৰতিনিধিয়ে উপায়ুক্তক স্মাৰক পত্ৰ প্ৰদান কৰি প্ৰতিবাদী কাৰ্যসূচী সামৰণি মাৰে।
ৰাইজৰ দলৰ কেন্দ্ৰীয় উপ সভাপতি বেদান্ত লস্কৰে মূল্যবৃদ্ধি ৰোধ নকৰিলে সমগ্ৰ ৰাজ্যজুৰি আন্দোলন গঢ়ি তুলিব বুলি হুংকাৰ প্ৰদান কৰে। লগতে শাসকীয় দলৰ মন্ত্ৰী-বিধায়কে মূল্যবৃদ্ধিক লৈ কৰা তুলুঙা মন্তব্য কেতিয়াও সহ্য কৰা নহব বুলি কয়।