ভাৰতীয় ক্ৰিকেট দলৰ প্ৰাক্তন ক্ৰিকেটাৰ তথা কংগ্ৰেছ নেতা নৱজ্যোত সিং সিদ্ধুক ১৯৮৮ চনৰ এটা ৰোড ৰেজ গোচৰত এবছৰৰ কাৰাদণ্ডৰে দণ্ডিত কৰা হৈছে।
সিদ্ধুক নিৰ্দিষ্ট সময়ৰ ভিতৰত আদালতৰ সন্মুখত আত্মসমৰ্পণ কৰিবলৈ নিৰ্দেশ দিছে আদালতে।
অভিযোগ অনুসৰি ১৯৮৮ চনৰ ২৭ ডিচেম্বৰত সিদ্ধুৱে পথৰ মাজতে গুৰনাম সিঙ নামৰ এজন ব্যক্তিৰ মূৰত প্ৰহাৰ কৰিছিল আৰু এই আঘাতৰ ফলত তেওঁৰ মৃত্যু হৈছিল।
পঞ্জাৱ কংগ্ৰেছৰ প্ৰাক্তন মুৰব্বী সিদ্ধুক ব্যক্তি এজনক স্বেচ্ছাই আঘাত কৰাৰ বাবে দোষী সাব্যস্ত কৰা হৈছে। অৱশ্যে আদালতে হত্যাৰ অভিযোগৰ ক্ষেত্ৰত সিদ্ধুক নিৰ্দোষী ঘোষণা কৰে।
উল্লেখ্য যে উক্ত গোচৰত পাটিয়ালাৰ সত্ৰ ন্যায়ালয়ে ১৯৯৯ চনৰ ২২ ছেপ্টেম্বৰত প্ৰমাণৰ অভাৱত সিদ্ধুক নিৰ্দোষী সাব্যস্ত কৰিছিল।
ইয়াৰ পিছতে নিহত ব্যক্তিজনৰ পৰিয়ালে পঞ্জাৱ আৰু হাৰিয়ানা উচ্চ ন্যায়ালয়ৰ সন্মুখত সত্ৰ ন্যায়ালয়ৰ ৰায়ক প্ৰত্যাহ্বান জনাইছিল। আদালতে ২০০৬ চনত সিদ্ধুক দোষী সাব্যস্ত কৰি তিনি বছৰৰ কাৰাদণ্ড প্ৰদান কৰিছিল।
আনহাতে এই আদেশক প্ৰত্যাহ্বান জনাই সিদ্ধুৱে উচ্চতম ন্যায়ালয়ৰ সন্মুখত আপীল দাখিল কৰিছিল।
