উত্তৰ কাছাৰ স্বায়ত্তশাসিত পৰিষদৰ নিৰ্বাচন পিছুৱাই আছে বিজেপি চৰকাৰে; নিৰ্বাচনৰ দাবীত ৰাজ্যপালক সাক্ষাৎ প্ৰতিনিধি দলৰ
অহা ৩ ডিচেম্বৰত অন্ত পৰিব বিজেপি শাসিত উত্তৰ কাছাৰ পাৰ্বত্য স্বায়ত্ত শাসিত পৰিষদৰ বৰ্ধিত ছমাহৰ কাৰ্যকালৰ। কিন্তু এই বৰ্ধিত সময়খিনিৰ ভিতৰতো নিৰ্বাচন পাতিবলৈ সক্ষম নহ’ল ৰাজ্য চৰকাৰ।
এনে ৰাজনৈতিক পৰিস্থিতিত পৰিষদৰ শাসনভাৰ ৰাজ্যপালে চমজি লোৱাৰ উপৰি পৰিষদ নিৰ্বাচন ১৫ ফেব্ৰুৱাৰিৰ পূৰ্বে অনুষ্ঠিত কৰিব লাগে বুলি দাবী লৈ উত্তৰ কাছাৰৰ এটা প্ৰতিনিধি দলে ২৬ নৱেম্বৰত ৰাজভৱনত ৰাজ্যপাল অধ্যাপক জগদীশ মুখীক সাক্ষাৎ কৰে।
প্ৰতিনিধি দলটোত আছিল হাফলঙৰ প্ৰাক্তন বিধায়ক তথা এন পি পি দলৰ সভাপতি সমৰজিত হাফলংবাৰ, প্ৰাক্তন সাংসদ তথা অগপ নেতা প্ৰকান্ত ৱাৰিচা, পৰিষদ সদস্য লালথাংছাং মাৰ, অগপ নেতা জেদ নুনিচা, এন পি পি নেতা সুনিত দিব্ৰাগেডে, পৰিষদ সদস্য খুৱুলথাং মাৰ, ফ্ৰেন্সিছ পৈথং আদি।
উল্লেখযোগ্য যে দেবলাল গাৰ্লোচা নেতৃত্বৰ বিজেপি শাসিত উত্তৰ কাছাৰ পাৰ্বত্য স্বায়ত্ত শাসিত পৰিষদৰ প্ৰকৃত কাৰ্যকাল যোৱা ৩ জুন তাৰিখেই অন্ত পৰিছিল। কিন্তু সংবিধানৰ ষষ্ঠ অনুসূচীৰ মুৰব্বী ৰাজ্যপালে জাতীয় নাগৰিকপঞ্জী উন্নীতকৰণৰ অজুহাতত পৰিষদৰ কাৰ্যকাল আৰু ছমাহ বৃদ্ধি কৰি দিছিল।
ইপিনে ৰাজ্যপালৰ কাৰ্যকাল বৃদ্ধিৰ ইছ্যুক চেলেঞ্জ জনাই ন্যায়ালয়ৰ দ্বাৰস্থ হয় প্ৰাক্তন বিধায়ক সমৰজিত হাফলংবাৰ। গুৱাহাটী ন্যায়ালয়ে সুদীৰ্ঘ পাঁচ মাহৰ মূৰত যোৱা ৮ নৱেম্বৰত নিৰ্দেশ দিয়ে যে অহা ৩১ জানুৱাৰিৰ পৰা ১৫ ফেব্ৰুৱাৰিৰ ভিতৰত স্বায়ত্ত শাসিত পৰিষদৰ নিৰ্বাচন অনুষ্ঠিত কৰিব লাগিব।
প্ৰাক্তন বিধায়ক হাফলংবাৰে কয় যে পাহাৰীয়া জিলাৰ কাৰণে পৃথক সংবিধান থকাৰ পাছতো পৰিষদ নিৰ্বাচনৰ কাৰণে আদালতৰ দ্বাৰস্থ হ’ব লগাটো দুৰ্ভাগ্যজনক। আনহাতে যিহেতু ৩ ডিচেম্বৰত পৰিষদৰ অতিৰিক্ত ছমাহৰ কাৰ্যকালো উকলি যাব সেই কাৰণে নিৰ্বাচন নোহোৱালৈকে পৰিষদৰ শাসন ক্ষমতা ৰাজ্যপালে চমজি ল’ব লাগে বুলিও মন্তব্য কৰে।
প্ৰাক্তন সাংসদ প্ৰকান্ত ৱাৰিচাই কয় যে ডিমা হাচাও জিলাত লাহে লাহে গণতান্ত্ৰিক ব্যৱস্থা নাইকিয়া হ’বলৈ ধৰিছে। কাৰণ চৰকাৰৰ প্ৰত্যক্ষ হস্তক্ষেপত সাধাৰণ ৰাইজ নিজৰ ৰাজনৈতিক অধিকাৰৰ পৰা বঞ্চিত হৈছে। কাৰণ ছমাহ পাছতো পৰিষদ নিৰ্বাচন সন্দৰ্ভত চৰকাৰে কোনো ব্যৱস্থা ল’ব পৰা নাই। “সেই কাৰণে আমি ৰাজ্যপালক সাক্ষাৎ কৰি দাবী উত্থাপন কৰিছো।” ৱাৰিচাৰ মন্তব্য।
সাক্ষাতৰ সময়ত অনতিপলমে নিৰ্বাচন অনুষ্ঠিত কৰা হ’ব বুলি ৰাজ্যপালে তেওঁলোকক আশ্বাস দিয়া বুলি জানিবলৈ দিয়ে।